BOBONARU, 07 Maiu 2025 (TATOLI)—Instititu Apoia Dezenvolvimentu Emprezariál (IADE) liuhusi Sentru Dezenvolvimentu Emprezariál (CDE, sigla Portugés) munisípiu Bobonaru, kuarta ne’e, realiza formasaun Buka Negosiu Inovativu (BI) ba foinsa’e empregadór hamutuk na’in-25 iha Bobonaru.
Notisia Relevante: IADE fasilita formasaun buka ideia negósiu ba joven 25 iha Bobonaro
Diretór Instititu Apoia Dezenvolvimentu Emprezariál (IADE) no Sentru Dezenvolvimentu Emprezariál (CDE, sigla Portugés) munisípiu Bobonaru, Paulo Bonifaçio, hateten IADE liuhusi Sentru Dezenvolvimentu Empresariál (CDE) realiza formasaun módulu Buka Ideia Negosiu (BIN) durante loron rua (2).
“Objetivu apoiu partisipante sira identifika no dezenvolve ideia negósiu ne’ebé potensiál foka liu ba dimensaun inovasaun apar ho poténsia lokál. Ideia poténsia hanesan ita labele Copy Paste buat ne’ebé mak ema halo nanis tiha ona, maibé oinsa para loke sira-nia hanoin atu haree. Maizumenus ita bele halo buat foun ruma ne’ebé poténsia tebes. Ezemplu, ita halo negósiu ida karik, ita faan ho modelu hanesan de’it, ita he’in konsumidór sira mak mai. Maibé oinsa ita halo inovasaun ita mak ba hasoru konsumidór sira ho maneira atendimentu ne’ebé diak. Seluk mak oinsá atu bele atrai konsumidór sira hodi bele hetan rendimentu barak liután,” Diretór IADE CDE munisipiu Bobonaru, Paulo Bonifaçio, informa ba jornalista sira iha kna’ar fatin.
Nia hatutan, formasaun ne’e hanesan faze ka prosesu ida atu prepara partisipante sira hodi partisipa iha Kompetisaun Planu Negosíu Inovativu (PNI) tinan 2025.
“Prosesu tuir mai sira hamosu tiha ideia negosíu, depo’is tuir fali mai ekipa IADE sei halo selesaun. Depois, sira-ne’ebé ninia ideia negosíu di’ak, entermus de poténsia haree ba dimensaun inovasaun nian, entaun ne’e sei pasa fali ba iha faze tuir mai, tuir formasaun ida Komesa Ita-nia Negosíu (KIN). Ida-ne’e, oinsa ho sira atu prepara sira-nia planu negósiu bazeia ba ideia inovativu ne’ebé sira hamosu ona iha formasaun ohin ne’e,” nia dehan.
Sekretáriu Autoridade Munisípiu Bobonaru ba asuntu Sosiál, Julio Carvalho Caeiro, louva IADE no konsidera liuhusi programa ne’e bele apoia Politika Desentralizasaun Administrativa no Poder Lokál.
Tanba ne’e, nia husu ba partisipante sira atu aproveita didi’ak oportunidade ne’e hodi Buka Ideia Negosíu ne’ebé Inovativu.
“Programa ida-ne’e atu motiva jerasaun foun sira ba oin ne’e halo negósiu ida di’ak liután. Se lae, ita Timor ne’e abitua negósiu ida Copy Paste hanesan ida-ne’e tunu-sate, aban ida-ne’ebá mós loke tan tunu-sate, bainrua ida-ne’ebá loke tan sai barak liután. Maibé, loloos ne’e bele hela, ha’u bele tunu-sate maibé uza meiu ida para atu atrai ema gosta ha’u nian, ida-ne’e mak importante. Maibé, ha’u sente ho programa ida-ne’e, ba oin imi bele susesu halo negósiu ida inovativu ne’ebé atrai ema ho atendimentu ne’ebé di’ak, nune’e ema hakaraik mai beibeik,” nia hateten.
Enkuantu, programa Planu Negosíu Inovativu iha munisípiu Bobonaru hatudu rezultadu di’ak, tanba partisipante sira balun ba kompete iha nivél nasionál konsege okupa iha kintu no terseiru lugar.
IADE nu’udár instituisaun autonomu ida-ne’ebé tutela ba iha Ministériu Koordenadór Asuntu Ekonómiku (MKAE) ho ninia mandatu ba apoiu dezenvolvimentu emprezariál iha Timor-Leste.
Iha tinan 2025 ne’e, IADE sei realiza fila-fali Kompetisaun Planu Negósiu Inovativu (KPNI) ne’ebé fó biban ba setór hotu-hotu (multi seitorál) atu partisipa hodi kompete atividade ne’e nu’udar estratéjia motivasaun ida ba hamosu emprezáriu joven inovativu, husi seitor oioin iha territoriu nasional no espesialmente Munisipiu Bobonaro nu’udar faze ka prosesu husi kompetisaun ne’e.
Notisia Relevante : CDE Bobonaro husu joven sira prepara-aan kompete iha KPNI 2024
Jornalista : Sergio da Cruz
Editór : Cancio Ximenes
