DILI, 08 Maiu 2025 (TATOLI)—Diretór Nasionál Prevensaun no Kontrolu Moras Ministériu Saúde, Florindo Pinto Gonzaga, hateten husi fulan-Janeiru to’o Maiu 2025, Ministériu Saúde (MS) rejista ona kazu Dengue Hemorájiku ne’ebé hamate ona ema na’in-neen iha Munisípiu Dili, Likisá no Manufahi.
“Númeru mate ne’e to’o ohin loron hamutuk ema na’in-neen. Hosi ne’e, ema na’in-tolu hosi Likisá, na’in-rua hosi Dili no na’in ida hosi Manufahi. Husi totál mate ne’e maioria labarik ho idade tinan 1-14,” Gonzaga dehan ba TATOLI iha Menzies Lecidere, Dili, kuarta ne’e.
Notísia relevante: Abríl, pasiente dengue na’in-60 rejistadu iha SSMD
Nia afirma, kazu mate ne’e tanba inan-aman barak hanoin katak bainhira labarik isin-manas ne’e buat normál ida.
“Promosaun saúde oinoin ne’ebé ami hato’o, maibé ami nota katak inan-aman barak bainhira iha tempu udan, labarik sira isin-manas, sira hanoin katak isin-manas ne’e buat ida normál, entaun sira la lori bá fasilidade saúde ne’ebé besik. To’o grave ona mak sira lori bá, médiku sira la salva ona,” nia haktuir.
Florindo hateten, tuir dadus ne’ebé MS rekolla iha tinan 2025, kazu moras dengue hamutuk 628 ne’ebé kompostu husi Munisípiu Aileu iha na’in-tolu, Ainaru iha na’in-ida, Baukau iha 16, Bobonaru iha 63, Dili iha 361, Ermera na’in-haat, Likisá 164, Manatutu iha na’in-tolu, Manufahi na’in-haat no na’in-sia iha RAEOA.
Jornalista: Felicidade Ximenes
Editór: Xisto Freitas da Piedade
