Dili, 08 Maiu 2025 (TATOLI)—Prezidente Repúblika, José Ramos Horta, kuarta (07 Maiu 2025) ne’e, simu Senadu no Antigu-Primeiru-Ministru Reinu Kamboja, Samdech Akka Moha Sena Padei Techo Hun Sen, ho parada militár iha Palásiu Prezidensiál Prezidente Nicolau Lobato, Bairru Pité, Dili.
“Ho laran kmanek ha’u hato’o bem-vindu ba Samdech Akka Moha Sena Padei Techo Hun Sen, Prezidente Senadu no Antigu Primeiru-Ministru Reinu Kamboja nian, hala’o nia vizita istóriku mai Timor-Leste ne’e. Prezensa Samdech Techo Hun Sen iha Timor-Leste la’ós de’it simboliza amizade entre nasaun rua maibé mós loke kapítulu foun iha relasaun entre povu ho povu,” Prezidente José Ramos Horta hateten liuhusi nota ne’ebé Tatoli asesu.
Vizita istóriku ida-ne’e marka etapa signifikativu iha relasaun bilaterál entre Timor-Leste no Kamboja, hafoin estabelesimentu Embaixada Kamboja nian iha Dili no aprezentasaun kredensiál husi Embaixadór CHUN Sovannarith iha loron 29 Abril 2025.
Iha loron 08 fulan-Maiu, Prezidente José Ramos Horta sei hala’o enkontru bilaterál ho Samdech Akka Moha Sena Padei Techo Hun Sen, akompaña husi delegasaun altu nível husi nasaun rua nian, iha Palásiu Prezidensiál Nicolau Lobato.
Mais tarde, Samdech Techo Hun Sen sei hato’o diskursu iha Parlamentu Nasionál no hala’o sorumutuk bilaterál ho Prezidente Parlamentu Nasionál, Maria Fernanda Lay, no Primeiru-Ministru, Kay Rala Xanana Gusmão.
Iha kalan, loron 08 fulan-Maiu, Prezidente José Ramos Horta sei oferese bankete ofisiál hodi fó onra ba vizita ofisiál Samdech Akka Moha Sena Padei Techo Hun Sen nian.
Iha loron 09 fulan-Maiu, Prezidente José Ramos Horta sei entrega honra aas liu Orden Timor-Leste nian ba Samdech Techo Hun Sen iha Palestra Prezidensiál 2025 Série I, ne’ebé sei hala’o iha Palásiu Prezidensiál Nicolau Lobato.
Hafoin serimónia ne’e, Samdech Techo Hun Sen sei hato’o diskursu prinsipál ida ho títulu “Hun Sen nia Lisaun sira: Husi Jenosídiu no Pobreza ba Liberdade no Prosperidade.”
Vizita Samdech Akka Moha Sena Padei Techo Hun Sen subliña profundamentu amizade entre Timor-Leste no Kamboja no reflete kompromisu komún nasaun rua nian ba kooperasaun no dezenvolvimentu rejionál iha kuadru ASEAN nian.
Hun Sen to’o iha Palásiu Prezidensiál tuku 8h30, no husi aktu ne’ebé Timor-Leste halo ba Hun Sen atu hametin liutan relasaun amizade enre Timor-Leste ho Kamboja. Tuir orariu ne’ebé iha, Hun Sen nia vizita ofisiál mai Dili husi loron 07 to’o loron 09 fulan maiu tinan 2025.
TATOLI
