DILI, 08 Maiu 2025 (TATOLI) – Primeiru-Ministru (PM), Xanana Gusmão, simu vizita Prezidente Senadu Reinu Kamboja, Hun Sen, no ko’alia kona-ba asuntu sira ligadu ho interese komún, no destaka ba reforsa kooperasaun polítika no ekonómika iha país rua ne’e.
Primeiru-Ministru, Xanana Gusmão, hateten durante reuniaun ho antigu Xefe Governu Kamboja, manifesta profunda apresiasaun ba vizita ofisiál ida-ne’e, no afirma katak ida-ne’e hanesan onra ida hodi simu Hun Sen iha país ne’e no espera vizita ida-ne’e iha ninia signifikadu kle’an.
Primeiru-ministru subliña kona-ba lasu amizade, istóriku entre nasaun rua ne’e no konsidera Hun Sen nu’udár amigu di’ak ida ba Timor-Leste durante tempu naruk.
“Relasaun amizade ho Hun Sen nakonu ho respeitu tanba ninia empeñu duradoura lideransa kona-ba solidariedade rejionál”, Xanana hateten iha nota imprensa ne’ebé Tatoli asesu, ohin.
Molok hakat bá Palásiu Governu, iha dadeer Hun Sen hala’o uluk enkontru bilaterál ho Prezidente Repúblika, José Ramos-Horta, iha Palásiu Prezidensiál no mós partisipa iha sesaun solene iha Parlamentu Nasionál.
Iha Parlamentu Nasionál, Hun Sen manifesta konviksaun kona-ba Timor-Leste merese sai hanesan 11.º membru ASEAN nian. Hun Sen akresenta kona-ba Kamboja fó totalmente apoiu ba adezaun plena Timor-Leste nian ba ASEAN, dezde inísiu no serbisu maka’as atu promove konsensu iha ASEAN kona-ba proposta Timor-Leste nian.
Timor-Leste no Kamboja estabelese relasaun diplomátika iha tinan 2002, inaugura ona ninia reprezentasaun diplomátika iha Phnom Penh no Dili iha tinan sira tuirmai.
Iha 2022, bainhira asume prezidénsia ASEAN nian, Kamboja hatuur-an ho papél importante iha aprovasaun akordu ba prinsípiu sira kona-ba adezaun plena Timor-Leste (TL) nian ba organizasaun rejionál ne’e.
Tuir ajenda, aban 09 Maiu 2025, Prezidente Hun Sen sei simu kondekorasaun Grande Colar Órdem Timor-Leste nian, hanesan kondekorasaun asa-liu husi Estadu TL ba rekoñesimentu kontribuisaun iha fortalesimentu relasaun bilaterál, liuliu ba apoiu kontínua durante prosessu adezaun Timor-Leste nian ba ASEAN.
Notísia relevante: Hun Sen partilla razaun estratéjika ba adezaun Kamboja iha ASEAN ba membru PN
TATOLI
