DILI, 09 Mei 2025 (TATOLI)—Sekretáriu Jerál Organizasaun Nasaun Unida (ONU), António Guterres, hato’o nia felisitasaun ba Papa foun Leão XIV ne’ebé eleitu nu’udar líder másimu igreja katólika nian iha mundu.
Iha deklarasaun ofisiál Sekretáriu Jerál ONU ne’ebé fó sai ohin, Guterres subliña iha esperansa boot ba kontinuasaun kooperasaun entre ONU no Vatikanu hodi harii mundu ida ne’ebé nakonu ho dame no justu bazeia ba solidariedade globál.
“Ha’u hato’o ha’u nia parabéns ho laran tomak ba Papa Leão XIV no katóliku sira iha mundu tomak”, António Guterres, hateten liuhusi nota imprensa ne’ebé Tatoli asesu ohin.
Eleisaun Amu Papa nian, tuir Sekretáriu Jerál ONU hateten ida ne’e la’ós de’it eventu espirituál importante ida ba katóliku millaun resin, maibé mós momentu globál ida, liuliu iha situasaun mundiál nia leet ne’ebé hasoru krize umanitária, sosiál no ekolójika oioin.
António Guterres hatete katak presiza tebes lian morál ida hanesan Papa Leão XIV nian hodi afirma dame, justisa sosiál no dignidade umana.
“Ita-nia mundu presiza lian sira ne’ebé maka’as liu ba dame, justisa sosiál, dignidade umana no domin ka kompaixaun,” nia hateten.
Relasiona falesimentu Papa Francisco Eis Primeiru-Ministru Portuál mós hatudu nia hakarak atu iha kontinuasaun hosi relasaun entre Vatikanu ho ONU, ne’ebé metin ona durante Papa Francisco nia pontifikadu.
Nia afirma katak kooperasaun ne’e hala’o ona papél importante iha esforsu globál sira ba rekonsiliasaun, halakon kiak, protesaun ambientál, no promosaun dame mundiál.
“Ha’u hein atu iha kontinuasaun naruk kooperasaun nian entre ONU no Vatikanu, ne’ebé foin lalais ne’e haburas hosi Papa Francisco, hodi avansa solidariedade, haburas rekonsiliasaun, no harii mundu ida justu no sustentável ba ema hotu”, nia tenik.
Relasiona ho mensajen Papa Leo XIV nian kona-ba dame, Sekretáriu Jerál mós destaka liafuan dahuluk hosi Papa Leão XIV bainhira nia kumprimenta mundu hosi Loggia Bazílika São Pedro nian: “Dame hela ho imi hotu.”
Nia dehan mensajen ne’e hanesan xamada universál ida ne’ebé reflete saudade kle’an hosi umanidade tomak ba dame, la haree ba diferensa relijiaun nian, ras ka orijen nian.
“Maske ema-nia orijen no fiar direfente maibé ema hothotu iha ne’ebé deít ho objetivu ne’ebé hanesan hakark dame, hein katak mundu tomak hetan dame” nia konklui.
Notísia relevante: Leão XIV, Papa agostinianu dahuluk husi norte-amerikanu
Jornalista : Arminda Fonseca
Editora : Maria Auxiliadora
