Autoridade husu MOP buka solusaun estrada pakote kilómetru rua ba Liaruka

VIKEKE, 12 Maiu 2025 (TATOLI)—Xefe suku Liaruka, postu administrativu Ossú, munisípiu Vikeke, Filomeno Soares ‘Manu Aman’, husu Ministériu Obra Públika (MOP) atu buka solusaun ba estrada pakote kilómetru rua ne’ebé atu tama ba suku ne’e, agora seidauk implementa obra tanba empreza rezigina-aan.

Notísia Relevante: Estrada rurál Ossu-Liaruka ho naruk kilómetru 6 hahú reabilita

“Estrada atu tama ba ha’u-nia suku kilómetru rua la’o hela, iha parte klaran kilómetru rua mak la la’o, to’o fali iha suku kilómetru rua agora servisu sei la’o hela. Ne’ebé, ha’u-nia suku ne’e hamutuk kilómetru neen (6), maibé kilómetru rua empreza manán obra la implementa.  Tan ne’e, ha’u prepara ona karta hodi entrga ba asesór Vise MOP hodi realata ba Ministru, tanba empreza 83 Larigutu Unipesoál, Lda, ne’ebé responsável ba estrada kilométru rua ne’ebé durante ne’e empreza la implementa obra,” Filomeno Soares ‘Manu Aman’ hateten ba Agência Tatoli, iha resintu administrasaun munisipál Vikeke, ohin.

Autoridade Liaruka ne’e husu Ministériu tau konsiderasaun ba karta ne’ebé hato’o ba Minsitru hodi tau matan ba estrada kilómetru rua ne’ebé obra la implementa.

“Ha’u-nia kompeténsia mak hato’o ba Ministru, ministru mak bele deside atu halo fali konkursu públiku no nomea fali empreza seluk atu lori hadi’a fali projetu estrada kilómetru rua ne’e. Nune’e, atu ita-nia komunidade husi suku Liaruka bele asesu ba estrada tanba durante estrada sai difikulta ba komunidade nia movimentu,” nia dehan.

Tanba ne’e, veteranu ne’e fó esperansa ba Governante sira hodi buka solusaun ba estrada kilómetru rua iha suku Liaruka ne’ebé empreza la kontinua ho obra konstrusaun referida.

Suku Liaruka ho totál aldeia hamutuk lima (5) ne’e kompostu husi Baha-Neo, Cai-Ua, Liacuda, Liaruca, Selele ho totál populasaun tuir sensu 2015 hamutuk 1008.

Hatán ba preokupasaun ne’e, Asesór Vise MOP, Rui Hernania Guterres, haktuir,kona-ba estrada rurál pakote ida-ne’ebé liga suku Liaruka empreza asina tiha kontratu mak rezigna-aan tanba empreza lakohi ezekuta ona Estrada referida, liuhusi karta ne’ebé xefe suku Liaruka hato’o ne’e atu bolu fila-fali empreza vensedór daruak hodi kaer obra.

“Loos duni, iha ita-nia lista projetu estrada rurál pakote ida kolómetru rua ne’ebé ita la kategória abandona, paradu, maibé ita kategória rezigna aan. Entaun la tama iha lista paradu ne’e, empreza ne’e rezignaa an iha tinan 2022, empreza rasik mak haruka karta rezingna aan ba diretór MOP Vikeke. Depois karte ne’e haruka ba nasionál, maibé laiha resposta to’o agora. Nune’e karta husi autoridade Liaruka fó ba ami no ami sei entrega ba Ministru hodi haruka ba Komisaun Nasionál Aprovizionamentu (CAN, sigla portugés) hodi haree fali empreza segundu vensedór. Ita la presiza loke konkursu, ita sei rekomenda empreza segundu vensedór hodi kaer obra. Tanba obra ne’e kuaze tinan rua ona la implementa,” nia hateten.

Notísia Relevante: Líder komunitáriu husu Governu hadi’a estrada suku Liaruka Viqueque

Jornalista  : Vitorino Lopes da Costa

Editór         : Cancio Ximenes