LFTL taka ona janela transferénsia ba klube Primeira Divizaun
DILI, 12 Maiu 2025 (TATOLI)–Diretór Kompetisaun Liga Futeból Futeból Timor-Leste (LFTL), Frederico Martins, hateten liga taka ona janela transferénsia ba klube primaira divizaun tanba durante fulan ida nia laran ne’e orgaun liga loke ona janela transferénsia ba klube sira atu rejistu jogadór sira, kompleta dokumentu no maioria klube mak kumpre ona.
Notísia Relevante: LFTL hahú elabora planu orsamentu hafoin realiza liga
“Kona-ba janela transferénsia ne’ebé mak termina ona horisehik, klube hamutuk 10 ne’ebé hamahan aan iha LFTL mak mai rejistu. Entaun, departamentu komunikasaun no verifikasaun sei fó tan loron tolu bainhira dokumentu seidauk kompleta bele kompleta,” Frederico hateten ba jornalista sira iha edifisiu LFTL Caicoli Dili, segunda ne’e.
Nia dehan, prosesu ba jogadór sira sei iha faze verifikasaun tanba klube barak mak kontrata jogadór estranjeiru no daudaun ne’e seidauk fó sai jogadór estranjeiru hira mak klube sira kontrata.
“Ita antes ne’e anúnsiu katak kada klube ida iha direitu absoluta atu rejistu jogadór estranjeiru hamutuk na’in-hitu maibé joga iha kampu laran autoriza de’it na’in-lima,” nia dehan.
Kona-ba jogu Primeira Divizaun sei hala’o abertura iha Estádiu Manatutu iha loron 24 fulan-Maiu mai ne’e, iha ne’ebé klube rua hanesan AD SLB Laulara no Karketu Dili FC mak sei kompete.
Klube 10 iha Primeira Divizaun mak hanesan, AD SLB Laulara, Karketu Dili FC, Coração FC, AS Ponta Leste, Portu Taibessi, Emannuel FC, AS Marca, Academica, Assalam FC no DIT FC.
Entretantu kona-ba klube sira segunda divizaun, Portavós LFTL Jordão Henrique, hateten sei fó tempu ba klube sira durante semana rua atu halo rejistu ba jogadór sira.
“Ba Segunda Divizaun ita fó tempu ba sira semana rua tan atu mai rejistu sira-nia jogadór nia naran atu nune’e bele kompete iha liga tinan ida-ne’e, rejistrasaun ba sira ita sei taka iha 30 Maiu 2025,” Jordão hateten.
Ba Segunda Divizaun nian, tuir nia, jogu sei hahú hala’o iha 13 juñu 2025 to’o ramata.
Jornalista : Hortencio Sanchez
Editór : Cancio Ximenes
