DILI, 27 Marsu 2025 (TATOLI)–Prezidente Liga Futeból Timor-Leste (LFTL), Ipolito Soares, hateten daudaun ne’e elabora hela planu orsamentu hafoin LFTL realiza liga iha fulan hira mai oin.
Notísia Relevante: Prezidente LFTL eleitu promete prepara millaun $1 resin ba Liga époka 2025
“Daudaun ne’e ita iha ona faze preparasaun ba orsamentu no kalendariu ba liga nian, hafoin ita realiza liga,” Prezidente LFTL ne’e hateten ba Agência TATOLI, kinta ne’e.
Antigu Prezidente klube Assalam FC ne’e dehan, planu hirak ne’e submete ona ba Governu Konstitusionál da-sia (IX) liuliu Ministeriu Juventude Desportu Arte no Kultura (MJDAK) atu haree.
“Planu sira ami entrega ona ba Governu, agora sira sei haree hela oinsá konvoka fali enkontru ida triparte sei envolve Governu rasik, Federasaun Futeból Timor-Leste (FFTL) no LFTL. Liga hein de’it informasaun husi Governu tanba Governu mak sei finansia liga hodi hala’o atividade, Governu mós mak sei autoriza Estádiu sira bele realiza jogu ka lae,” nia dehan.
Antes ne’e, orgaun liga realiza ona enkontru ho klube 17 ne’ebé durante ne’e hamahan-aan iha LFTL no ko’alia ona asuntu lubuk ida no hein de’it desizaun klaru husi Governu atu apoiu orsamentu no autorizasaun ba Estádiu hodi realiza jogu mak liga bele loke janela transferénsia, nune’e klube bele rejistu jogadór.
“Kona-ba orsamentu ita husu husi Governu no FFTL, maibé ita mós esforsu hela hodi husu apoiu ba patrosinadór sira iha rai-laran no rai-liur hodi suporta mós orsamentu balun,” nia hateten.
Klube sira hamahan-aan iha primeira divizaun mak hanesan AD. SLB Laulara, Karketu Dili FC, Emannuel FC, Assalam FC, Aitana FC, DIT FC no AS Ponta Leste.
Klube sira hamahan-aan iha Segundu divizaun mak hanesan Nagardjo FC, Atletico Ultramar/Coração, Academica FC, Zebra FC, Kablaki FC, Lika-Lika Lemorai FC, AS Marca, Santa Cruz FC no FIEL FC.
Notísia Relevante: Prezidente LFTL husu Governu nia partisipasaun iha liga tenke másimu
Jornalista : Hortencio Sanchez
Editór : Cancio Ximenes
