DILI, 10 Marsu 2025 (TATOLI)–Prezidente Liga Futeból Timor-Leste (LFTL), Ipolito Soares, hateten Governu tenke partisipa másimu iha liga rai-laran atu nune’e bele fó apoiu másimu hodi promove talentu jogadór sira-nian.
Notísia Relevante: Prezidente LFTL eleitu promete prepara millaun $1 resin ba Liga époka 2025
“Ita-nia liga agora ne’e, Governu nia partisipasaun tenke makaas Entermu finansiamentu. Fó subsídiu nation ba liga no klube sira atu bele hala’o atu jere klube sira, tanba iha klube sira-ne’e mesak jogadór timoroan ne’ebé idade joven, atu promove sira-nia talentu,” Ipolito hateten ba Agência TATOLI iha Faról Dili, segunda ne’e.
Nia dehan, ba oin atu dezenvolve futeból iha nasaun ne’e la’ós de’it orgullu nasionál maibé futeból tenke sai hanesan identidade nasionál.
“Ita tenke lori futeból ne’e la’ós orgullu nasionál de’it maibé sai mós hanesan identidade nasionál, atu nune’e ita-nia jogadór sira ba joga iha rai-li’ur bele hatudu rezultadu ne’ebé di’ak hodi defende ita-nia nasaun no ita-nia bandeira,” Ipolito tenik.
Tuir nia, daudaun ne’e Asian Football Confederation (AFC) no Federation International Football Asosiation (FIFA) kada tinan ida iha Federasaun Futeból Timor-Leste (FFTL) tenke fó apoiu ba liga ho jogu dala-90.
“Entaun ita-nia preparasaun agora, atu kompleta jogu 90 iha liga, ita-nia kalkulasaun ba jogu durante fulan neen (6), kada semana, ita tenke hala’o jogu dala lima (5), fulan ida ita hala’o jogu dala 20. Entaun, ita presiza fulan neen (6) to’o hitu (7) foin bele hotu, entaun ha’u-nia kalkulasaun orsamentu ba liga époka ne’e tenke millaun $2. Kada klube sei hetan subsídiu rihun $70 ne’e ideal, atu nune’e klube bele jere no auguenta jogu to’o fulan neen (6) ou hitu (7),” Ipolito hateten.
Nia hatutan, orsamentu ne’ebé ho montante boot tanba jogu ba liga sei hala’o hotu iha munisípiu hanesan Baucau no Ermera, tanba ne’e klube sira presiza orsamentu ne’ebé másimu atu halo preparasaun no LFTL rasik mós presiza orsamentu atu prepara kondisaun sira ba jogu.
“Semana liu-ba ami enkontru ona ho Governu, Ministériu Juventude Desportu Arte no Kultura (MJDAK), sira preparadu atu fó asisténsia ba liga hanesan fó subsidiu maibé la 100%. Ida-ne’e, ba ha’u, orgullu tanba Governu preparadu atu ajuda ita-nia liga maibé ami prepara ona proposta millaun $1 ba Governu. Karik, sira apoiu, ita sei hala’o jogu hotu ho di’ak. Se sira la apoiu 100% maibé laiha buat ida tanba parte FFTL mós sei apoiu no ami mós sei buka meiu ho parseiru nasionál no internasionál, atu nune’e bele fó apoiu. Ida-ne’e ita garante liga tenke la’o iha tinan ida-ne’e,” nia dehan.
Antigu Prezidente klube Assalam FC ne’e adianta tan, bainhira Governu fó apoiu orsamentu ba liga mak Governu sei la lakon tanba investe ba joven sira-nia talentu no lori orsamentu ba munisípiu.
“Goveru apoiu orsamentu ba liga, Governu sei la lakon buat ida, jogadór sira iha klube maioria timoroan, sira mak sei hetan osan sira-ne’e. Ita joga iha munisípiu, osan sira ba selu hela fatin iha munisípiu, hola hahan iha munisípiu. Signifika osan sira-ne’e ita lori ba kari iha munisípiu no dezenvolve ita-nia joven sira nia talentu buka mós fini ba jogadór selesaun nasionál ninian,” nia dehan.
Tuir planu, jogu hotu sei realiza iha fulan-Maiu tinan ida-ne’e no iha tempu besik LFTL sei tuur hamutuk ho klube hamutuk 17 husi primeira no segunda divizaun atu ko’alia kona-ba preparasaun hotu hodi avansa ba liga.
Tanba ne’e, iha semana oin, LFTL mós halo ona preparasaun atu loke janela transferénsia, nune’e klube sira bele rejistu jogadór sira-nia naran halo mós kontaktu ho jogadór entranjeiru hirak ne’ebé atu joga iha klube sira.
Kriteria ba jogadór estranjeiru sira mak kada klube sei autoriza jogadór estranjeiru na’in-lima (5) mak joga hamutuk ho jogadór lokál sira, atu nune’e bele hasa’e liután intensidade jogu nian.
Iha okaziaun ne’e, Ipolito husu mós ba klube sira, jogadór sira atu prepara aan hodi partisipa másimu iha liga ne’ebé sei akontese iha fulan-maiu mai ne’e.
Notísia Relevante: AS Marca hahú prepara-aan kompete iha liga époka 2025
Jornalista : Hortencio Sanchez
Editór : Cancio Ximenes
