DILI, 23 Fevereiru 2025 (TATOLI)–Klube Liga Futeból Timor-Leste AS Marca FC daudaun ne’e halo hela preparasaun hodi kompete iha liga époka 2025 ne’ebé tuir planu sei realiza iha fulan-Abríl 2025.
Notísia Relevante: LFTL-FFTL hahú diskute asuntu tékniku-kalendáriu realiza liga
“Bainhira ami rona dehan LFTL ho FFTL tur hamutuk ona atu realiza fali liga iha fulan-Abríl, Marca FC foti ona desizaun atu prepara ona jogadór sira. Ami mós fihir ona treinadór ida hodi fó treinamentu ba jogadór sira, terinadór ne’e seo mai seidauk bele fó sai lai. Ami tenke prepara másimu, nune’e bele kompete iha liga ne’ebé atu akontese ne’e,” Prezidente klube AS Marca Luis Evaristo Soares hateten ba Agência TATOLI iha Estádiu Munisipál Dili, foin lalais.
Marca FC nafatin mantein jogadór antigu sira-ne’ebé durante ne’e reforsa ona iha klube, maibé la taka dalan ba jogadór husi klube seluk hakarak reforsa klube ne’e.
“Ami kontinua mantein ami-nia jogadór tuan sira, maibé desizaun hotu treinadór mak sei haree. Se presiza jogadór foun ruma atu reforsa, ami sei haree hodi kontrata jogadór foun balun,” Prezidente ne’e hateten.
Antes ne’e, Liga Futeból Timor-Leste (LFTL) ho Federasaun Futeból Timor-Leste (FFTL) hahú hasoru malu hodi ko’alia kona-ba kalendáriu ba realizasaun liga no asuntu tékniku ne’ebé parte rua atu kompleta malu.
Enkontru entre parte rua importante tebes tanba parte rua tenke ko’alia ba malu hodi haree ba kalendariu jogu no mekanizmu preparasaun liga nian ba oin.
Koñese klube AS Marca
AS Marca harii iha tinan 2019 hodi kompete iha Liga Futeból Timor-Leste terseira Divizaun, ekipa sira estreia iha loron 08 fulan-Novembru hodi joga hasoru ekipa YMCA FC ba primeira volta kompetisaun nian.
Promosaun
Ho vitória dala-tolu no empata dala ida, ekipa AS Marca FC alkansa kampaña ne’ebé di’ak-liu iha grupu B no hetan promosaun ba LFTL segunda divizaun hamutuk ho ekipa Emmanuel FC, primeiru lugar iha grupu A.
Iha tinan 2020, tanba pandemia COVID-19, Liga Futeból Timor-Leste hala’o de’it kompetisaun ofisiál rua (2): Taça 12 de Novembro 2020 no kopa FFTL 2020.
Iha 2020, kopa FFTL hanesan dalan ida-ne’ebé FFTL hetan hodi troka kompetisaun LFTL Primeira Divizaun no LFTL Segunda Divizaun.
Kopa FFTL inklui ekipa LFTL primeira divizaun ualu (8) hotu no ekipa LFTL segunda divizaun hamutuk 12.
AS Marca FC partisipa iha kompetisaun tanba manán ona promosaun ba LFTL segunda Divizaun iha tinan 2019.
Ekipa ne’e estreia iha kompetisaun iha loron 30 fulan-Agostu tinan 2020, hasoru ekipa AS Ponta Leste no hetan tauk, AS Ponta Leste manan ho 7-0.
Maski ho estreia ne’ebé ladi’ak, AS Marca ikusmai rekupera no remata faze grupu nian iha segundu lugar, nune’e hetan klasifikasaun ba faze tuirmai.
Maibé, ekipa ne’e ladún iha sorte iha kuartu-finál no ikusmai eliminadu hosi kompetisaun hafoin lakon hasoru ekipa Lalenok United ho eskoru 6-0.
Jornalista : Hortencio Sanchez
Editór : Cancio Ximenes
