iklan

DESPORTU

LFTL-FFTL hahú diskute asuntu tékniku-kalendáriu realiza liga

LFTL-FFTL hahú diskute asuntu tékniku-kalendáriu realiza liga

Liga Futeból Timor-Leste (LFTL) ho Federasaun Futeból Timor-Leste (FFTL), hahú hasoru malu hodi diskute kona-ba kalendáriu ba realizasaun liga no asuntu tékniku sira, kinta (16 JANEIRU 2025). Imajen/Mídia LFTL.

DILI, 17 janeiru 2025 (TATOLI)–Liga Futeból Timor-Leste (LFTL) ho Federasaun Futeból Timor-Leste (FFTL), kinta (16 janeiru 2025) horisehik, hahú hasoru malu hodi diskute kona-ba kalendáriu ba realizasaun liga no asuntu tékniku sira.

Notísia Relevante: Prezidente FFTL enkoraja klube primeira-segunda divizaun prepara-aan tuir liga

Prezidente Interinu Liga Futeból Timor-Leste (LFTL), Octávio da Conceição, hateten enkontru ne’e importante tebes tanba parte rua tenke ko’alia ba malu hodi haree ba kalendáriu jogu no mekanizmu preparasaun liga époka 2025 nian ba oin.

Liga Futeból Timor-Leste (LFTL) ho Federasaun Futeból Timor-Leste (FFTL), hahú hasoru malu hodi diskute kona-ba kalendáriu ba realizasaun liga no asuntu tékniku sira, kinta (16 JANEIRU 2025). Imajen/Mídia LFTL.

“Enkontru ida-ne’e importante atu diskute kona-ba mekanizmu ka prosesu no kontinuasaun ba liga futeból iha ita-nia nasaun. FFTL foin realiza kongresu semana kotuk, ami hanesan órgaun liga iha obrigasaun atu mai hasoru hodi diskute kona-ba vizaun sira oinsá atu dezenvolve futeból iha Timor-Leste,” Octávio hateten ba Agência TATOLI iha edifisiu FFTL, ohin.

Nia dehan, durante enkontru líder másimu FFTL fó apoiu morál no tékniku ba LFTL atu mantein halo serbisu no iha tempu besik tenke realiza kongresu, hodi nune’e bele hili estrutura foun tanba mandatu atuál LFTL liu ona nia tempu.

“Prezidente husu ami atu halo preparasaun ne’ebé másimu oinsá bele realiza hikas liga ne’e. FFTL mós husu ami atu halo planu sira kona-ba liga atu submete mai sira, atu nune’e fulan hira mai oin ita bele realiza ona liga. Ami sei fila ba enkontru internál hodi prepara mós ami-nia kongresu atu bele hetan fila-fali lejitimidade no legalidade, mak ami foin entrega planu no kalendarizasaun liga nian ba FFTL. Ami mós sei ba hasoru Governu hodi rona hanoin sira hotu ne’ebé atu kontribui ba ita-nia dezenvolvimentu futeból,” nia dehan.

Liuhosi enkontru ne’e, nia dehan, tempu besik órgaun liga sei hala’o sorumutu ho klube primeira no segunda divizaun atu informa kona-ba liga atu reativa, nune’e klube sira bele organiza-aan atu hakat ba kompetisaun doméstika ne’ebé planeia atu realiza.

Antes ne’e, Prezidente FFTL Nilton Telmo Gusmão dos Santos hateten liga sei realiza iha fulan-juñu 2025, maibé ida-ne’e la konsege no sira deside ona muda mai iha fulan-abríl 2025.

“Ema barak preokupa kona-ba ita-nia kampu atu realiza liga, maibé ita ko’alia ona liga sei realiza iha fulan-abríl. Ema hotu hanoin ita só iha kampu úniku mak Estádiu Munisipál Dili, maibé ami sei buka meiu atu identifika ita-nia kampu tolu hanesan Gleno, Maliana no Baucau. Ita haree kampu tolu ne’e iha hela kondisaun, ne’ebé ba infrastrutura ne’e laiha problema,” nia hateten.

Nune’e, órgaun liga sei konsolida no diskute ho klube futeból sira atu diskute hodi bele organiza malu realiza kompetisaun hotu iha munisípiu ne’ebé identifikadu iha kondisaun Estádiu ka kampu di’ak.

Prezidente Federasaun Futeból Timor-Leste (FFTL), Nilton Telmo Gusmão dos Santos, rekomenda ba Liga Futeból Timor-Leste (LFTL) tenke realiza lalais kongresu atu hetan lideransa foun hodi lidera LFTL durante tinan haat ba oin.

“Ha’u husu liu ba LFTL tenke realiza lalais sira nia kongresu, tanba estrutura ida agora nia mandatu termina ona. Sira tenke hala’o kongresu hodi hili fali lideransa foun atu bele hahú fali kompetisaun sira hotu,” Nilton tenik.

Alende ne’e, nu’udar responsavel másimu ba FFTL hato’o agradesimentu ba estrutura atuál LFTL nian ne’ebé hola inisiativa hodi hasoru malu ho FFTL diskute kona-ba prepartivu hotu ba liga nian.

“Hanesan Prezidente FFTL, buat ne’ebé ha’u dehan ba órgaun liga mak ami apoiu másimu tebes ba LFTL atu organiza ita-nia liga, inklui kongresu ne’ebé atu realiza ne’e ami mós sei fó apoiu atu halo lais tiha kongresu ne’e. Maibé, ida-ne’e ita-nia Prezidente asembleia liga mak iha dever ba ida ne’ebá. Maibé, FFTL nia pozisaun mak ne’e, liga tenke la’o iha ita-nia rai-laran, ida-ne’e mak ami-nia misaun importante lidera FFTL,” nia dehan.

Nia mós husu ba LFTL atu realiza kompetisaun liga iha époka tomak ida ho jogu ne’ebé la’o ho  durasaun naruk la’ós jogu iho tempu badak de’it.

“Kestaun kona-ba tékniku hanesan orsamentu ita sei diskute, ami hein sira-nia proposta mai lai mak ita ko’alia. Ha’u fiar órgaun liga tanba uluk ha’u mai husi órgaun liga no sira iha duni paixaun atu organiza liga. Sira konta nafatin ho ha’u-nia apoiu, tanba ha’u sei fó apoiu másimu ba sira,” nia hateten.

Nu’udar Prezidente FFTL, nia mós husu ba Prezidente klube futeból iha Timor-Leste atu fó apoiu másimu hodi kontribui, nune’e liga bele la’o ho susesu tanba hanesan faze ida foin hahú no durante tinan naruk nia laran ne’e liga rai-laran paradu.

Notísia Relevante: Karketu DILI FC sólidu no preparadu kompete iha liga époka 2025

Jornalista : Hortencio Sanchez

Editór       : Cancio Ximenes

iklan
iklan

Leave a Reply

iklan
error: Content is protected !!