OEKUSI, 13 Maiu 2025 (TATOLI) – Institutu Nasionál Saúde Públika Timor-Leste (INSPTL) ho Partnership for Human Development Australia (PHD), fasilita formasaun ba parteira na’in-45 iha Rejiaun Administrativa Espesiál Oekusi Ambeno (RAEOA) kona-ba atendimentu ba inan-isin rua partu moos no seguru.
Diretór Nasionál Formasaun INSPTL, Gregório Rangel, relata formasaun ne’e realiza durante loron 10 ho fazeadamente, kada faze envolve parteira na’in-15 hodi aprende kona-ba teória no prátika.
Notísia relevante:INSPTL destaka profisionál saúde haat ho funsaun hitu iha Sentru KemON-B Pássabe
“Formasaun ne’e ba partu moos no séguru, ne’ebé ita hetan apoiu másimu husi parsériu PHD kolabora ho INSPTL, atu fasilita kapasitasaun ba partéria sira iha Oekusi, formasaun ne’e ba dala rua ona, dahuluk realiza iha 2023, nune’e espera katak ho formasaun ne’e bele responsde nesesidade saúde Oekusi liuliu ba atendimentu saúde primária foku liu ba inan no oan sira,” nia ko’alia iha salaun Dominikana Oekusi, ohin.
Matéria prinsipál durante formasaun loron 10 iha sesaun sia (9) teória no prátika, mak hanesan prevene infesaun, partu ba isin-rua sira iha sesaun lima, hafoin kuidadu bebé ne’ebé foin moris ikusliu fó atendimentu ba bebé moris mai ho kondisaun ladi’ak hanesan problema dada-iis, tanis, no kolorasaun ladi’ak.
“Prátika iha oin rua sei hala’o iha ospitál direita ba pasiente sira no teória mós hanesan durante loron lima,” nia dehan
Iha biban ne’e, Sekretáriu Rejionál ba Asuntu Saúde, Luís de Jesus Neno, agradese ba INSPTL tanba konsege responde pedidu ne’ebé servisu saúde Oekusi submete hodi mai fasilita formasaun ba profisionál saúde liuliu parteira sira.
“Ita agradese tanba liuhusi formasaun ne’e, bele iha mudansa ba parteira sira atu atende inan sira hahú kedas husi isin-rua to’o partu. Nune’e ha’u husu ba parteira sira uza oportunidade ne’e ho didi’ak atu hetan buat foun ruma hodi implementa iha idak-idak nia servisu fatin,” nia orgullu.
Entretantu, tuir dadús husi servisu saúde Oekusi, katak, parteira iha servisu saúde Oekusi hamutuk 102, koloka iha Ospitál Referál Oekusi, sentru saúde lima no postu saúde 20 inklui fatin tratamentu suku iha 12.
Notísia relevante:UNFPA planeia harii Sentru KEmON-B 20 iha munisípiu sira iha 2025
Jornalista: Abílio Elo Nini
Editór: Florencio Miranda Ximenes
