DILI, 13 Maiu 2025 (TATOLI)—Prezidente Liga Futeból Timor-Leste (LFTL), Ipolito Soares, hateten liga époka 2025 sei realiza durante fulan tolu hahú husi Maiu-Jullu no subsídiu ba klube Primeira Divizaun kada klube ida sei simu $30.000.
Notísia Relevante: LFTL hahú elabora planu orsamentu hafoin realiza liga
“Liga sei la’o fulan tolu, entaun ita prepara $30.000 kada klube Primeira Divizaun, Bainhira prosesu verifikasaun finaliza ona mak orgaun liga sei transfere uluk 40% ba klube sira no ikus liu sei transfere tan 60% husi $30.000 ne’e,” Ipolito hateten ba jornalista sira iha edifisiu LFTL Kaikoli, ohin.
Nia dehan, kona-ba prémiu kampiaun ba Primeira Divizaun $25.000 no Segunda Divizaun $10.000, enkuantu kona-ba prémiu $15.000.
“Liga ita hala’o fulan tolu de’it tanba ita foin hahú, ita mós iha difikuldade ba infraestrutura tanba iha Dili laran kampu sira sei iha faze konstrusaun, entaun ita tenke hala’o jogu iha munisípiu hanesan Manatutu ho Glenu. Ida-ne’e ita tenke gasta osan balun ba transporte dezlokasaun klube sira no ekipa organizadora liga nian,” nia hateten.
Kona-ba Segunda Divizaun sei hetan subsidiu $5.000 kada klube hanesan époka sira liu ona ba kotuk.
“Subsídiu ba Segunda Divizaun $5.000, ida-ne’e hanesan tinan sira ba kotuk ne’e, sira-nia jogu halo metade kompetisaun entaun sira-nia subsídiu mak hanesan ne’e. Ita mós planu ona Segunda Divizaun joga de’it iha Dili, sei la ba joga iha li’ur ka munisípiu, nune’e Segunda Divizaun sei laiha degradasaun. Ita planeia para iha apuramentu terseira divizaun ami sei hala’o iha jogu Tasa 12 de Novembru sei rejista klube 32, pois sira kompete ita sei hili klube di’ak tolu sa’e ba Segunda Divizaun,” nia informa.
Aleinde ne’e, LFTL mós prepara ona orasamentu ba prémiu jogu $1.000 kada jogu Primeira Divizaun, husi montante ne’e ekipa rua kontra malu sé mak manán nia sei hetan 70% no sé mak lakon sei hetan de’it 30% no jogu empata sei simu 50% kada klube rua ne’e.
Nune’e iha Segunda Divizaun LFTL prepara prémiu jogu hamutuk $500, no husi totál ne’e klube rua kontra malu bainhira sé mak manán nia sei hetan 70% no ida-ne’ebé lakon simu de’it 30%, maibé jogu empata mak ekipa rua sei simu 50%.
Tuir oráriu ne’ebé fó sai ona jogu ba Primeira Divizaun sei abertura iha loron 24 fulan-Maiu no Segunda Divizaun sei abertura iha loron 13 fulan-Juñu.
Jornalista : Hortencio Sanchez
Editór : Cancio Ximenes
