DILI, 15 Maiu 2025 (TATOLI)—Boxista timoroan “El-Tigre” ho naran kompletu Elidio da Conceição husi klube Boxe Revolta susesu iha nia kareira iha mundu Boxe, hanesan boxista timoroan dahuluk, ne’ebé oferese sintu dahuluk ba Timor-Leste, iha kompetisaun internasionál X Promotion Boxe ne’ebé realiza iha Bali-Indonézia semana kotuk.
Notísia Relevante: Boxista Elidio despede ho Governu hodi bá kompete boxe profisionál iha Indonézia
Boxista “El-Tigre, iha kinta (15 Maiu 2025) ne’e, ho nia ekipa fila hikas mai Timor-Leste ho aviaun Aero Dili. Iha Aeroportu Internasionál Prezidente Nicolau Lobato, Comoro, Dili, boxista ne’e simu kedan husi timoroan atus ba atus ne’ebé halibur aan hodi hein oriu fouun iha mundu boxe ne’e ninia prezensa.
Vitória ne’ebé Boxista “El-Tigre” hetan bainhira kompete ho boxista husi nasaun Rusia ho naran Alex no iha kompetisaun ne’e El-Tigre konsege hatudu prestasaun ne’ebé di’ak hodi manán Alex ho pontu ne’ebé diferensa.
Husi pontu ne’ebé diferensae lori El-Tigre iha direitu absoluta manán sintu ida-ne’ebé signifikante, ne’ebé boxista timoroan seluk seidauk hetan sintu refere maibé iha boxista timoroan balun ne’ebé durante ne’e oferese de’it medalla, nune’e boxista El-Tigre ne’e marka ona diferensa.
Boxista Elidio da Conceição “El-Tigre” hateten, vitória ne’ebé nia hetan no oferese sintu ida ba Timor-Leste ne’e espesiál iha komemorasaun loron Restaurasaun Independénsia 20 Maiu ba da-23 ne’ebé lorob balun tan Timor-Leste sei selebra.
“Agradese ba Maromak, agradese ba maluk timoroan sira hotu ne’ebé apoia maka’as mai ha’u. Kampiaun ne’ebé ha’u hetan la’ós ba ha’u de’it, maibé ba timoroan hotu. Sintu ida-ne’e ha’u ofrese ba loron nasionál 20 Maiu,” Elidio “El-Tigre” hateten ba jornalista sira.
Nia dehan, sintu ne’ebé nia hetan la’ós ida ne’e de’it maibé sei esforsu aan nafatin atu nune’e bele lori tan sintu ne’ebé di’ak-liu mai Timor-Leste.
Iha oportunidade ne’e, nia husu mós ba joven timoroan hotu apoia nafatin nia iha tempu saida de’it, tanba sintu ne’ebé nia hetan la’ós ikus maibé hanesan eskada ida ba joven seluk atu hatutan tan husi mundu boxe.
“Husu timoroan hotu atu apoia nafatin ha’u, sintu ida-ne’e la’ós ikus maibé ida-ne’e hanesan eskada ida atu ita hatutan ba oin. Liuliu ba joven sira, ida ne’e hanesan eskada ida atu hatutan tan ba oin,” Elidio dehan.
Iha fatin hanesan, treinadór klube Boxe Revolta, Aplinario Maria Guterres, hato’o agradesimentu ba timoroan hotu ne’ebé fó apoia maka’as ba nia ho Elidio liuhusi orasaun no meiu hotu, to’o ikus nia atleta bele sai duni kampiaun iha eventu internasionál X Promotion.
“Ha’u hanesan treinadór Elidio nian fó obrigadu ba rai doben Timor-Leste, liuliu ba joven no família sira hotu tanba imi-nia apoiu orasaun, apoiu morál, mak ohin loron ami manán sintu ida ne’e. Ami-nia alvu la’ós sintu ida-ne’e de’it maibé sei esforsu atu lori tan sintu mai ita-nia nasaun,” treinadór ne’e dehan.
Durante ne’e, boxista Elidio “El-Tigre” hala’o nia preparasaun iha nasaun Fransa, ne’ebé hetan apoiu másimu husi patrosinadór sira hanesan, Metro Link no seluk tan.
“Ami antes sai husi Timor-Leste, ami hasoru malu ona ho Prezidente Repúblika José Ramos Horta, hasoru mós Vise Primeiru-Ministru Francisco Kalbuadi Lay, sira hotu nia apoiu morál mak ami konsge ba halo preparasaun ho di’ak. Ba ami-nia esponsor Metro Link maun No, obrigadu, ikus-liu ha’u hakruuk ba povu doben Timor-Leste ho imi-nia apoia mak ami hatudu prestasaun,” nia dehan.
Iha sorin seluk, na’in ba klube Revolta, Sander Maria Almeida da Costa Serano hateten, nu’udar maun ida ba Elidio “El-Tigre” nafatin apoiu másimu ba nia iha kualker eventu tantu rai-laran no rai-li’ur.
“Ha’u hanesan esponsor, ha’u mós hanesan maun ida ba nia, sai hanesan família ida ba nia atu la’o ba oin. Buat hotu ita la’o tanba ita-nia rai doben Timor-Leste. Bainhira, nia halo saida mak di’ak ba ita nia nasaun, ita tenke apoia,” nia hateten.
Iha oportunidade ne’e, nu’udár mós patrosinadór másimu ba Elidio sente kontente no orgullu bele oferese sintu ida ba Timor-Leste.
“Sente kontente, maibé família hotu, timoroan hotu sente kontente tanba ida-ne’e foin dahuluk timoroan ida lori sintu mai Timor-Leste. Ida-ne’e la’ós piala ka tasa, la’ós medalla, maibé ne’e sintu duni, ha’u sente kontente,” nia dehan.
Kompetisaun entre Elidio “El-Tigre” versus nia adversariu Alex hala’o iha Bali-Indonézia iha loron 10 fulan-Maiu semana kotuk.
Notísia Relevante: Manan KO iha karreira profisionál, Boxista Elídio ‘El-tigre’ kontratadu hosi HSS-Indonézia
Jornalista : Hortencio Sanchez
Editór : Cancio Ximenes
