“…ho Maromak nia tulun mak ha’u haka’at ona ba oin”
DILI, 20 jullu 2024 (TATOLI) – Boxista timoroan ida-ne’ebé sempre hahenuk Tersu iha nia kakorok bainhira luta iha ring leten hasoru nia adversáriu sira, Elídio da Conceição “El-tigre”, husi klube Boxe El-Matador, hetan ona kontratu husi promotór Boxe Indonézia Holywings Sport Show (HSS).
“Agora nia hetan ona kontratu tinan ida husi HSS. Kada fulan nia simu ona osan husi HSS, maibé hira-hira ne’e konfidensiál. Ita orgullu tanba luta durante tinan barak la saugati,” Treinadór klube Boxe El-Matador, Abílio Orlando dos Santos hateten ba Agência TATOLI, sábadu ne’e, iha Colmera, Dili.
Rezultadu husi esforsu no dedikasaun ida, iha jornada Boxista Elídio da Conceição nian, bainhira envolve iha mundu boxe. Katak, kontratu ne’e nu’udar rezultadu halakon nia adversáriu, Jepriko Saragi, Boxista uma-na’in, iha Jakarta Indonézia (14/07), organizadu husi HSS.
Kronolojia, iha kompetisaun ne’e, Boxista timoroan Elídio manán ho desizaun unánime hasoru Jepriko iha luta ida iha Jakarta Indonézia foin lalais.
Dezde primeira volta, Elídio halo kedas presaun ba Boxista Indonézia, Jepriko Saragi, hodi soke ho nia liman-loos no liman-karuk ba Boxista uma-na’in ne’e.
Ho difikuldade Elídio nia laloran atake sira – Jab, straight, hook, ho uppercut, Jepriko dalaruma hakuak husi tuku ne’ebé Elídio halo hodi evita hetan pankada.
Elídio kontinua domina luta iha ronde hodi tuku monu duni Jepriko no halo Jepriko susar atu reziste.
Elídio nia liman-loos monu maka’as iha Jepriko nia oin iha ronde primeiru ne’e. Tuku ne’e halo falla kedan Jepriko foti liman hodi labele hasoru tan Elídio no árbitru hapara jogu no deside vitória ba Elídio. Elídio da Conceição “El-tigre” manan KO iha ronde primeiru.
Nune’e, ho Tersu iha kakorok nia hirus-matan, nu’udar Katóliku. No, tara kedan ho bandeira RDTL – mean, kinur, metan no fitun mutin nabilan, Boxista “El-matador” tara iha kotuk falun isin-lolon hatudu orgullu nu’udar timoroan iha ring leten perante júri no ema sira ne’ebé asiste jogu ne’e, hafoin árbitru hiit nia liman hodi haraik ba nia hanesan manán-na’in.
Tuir oráriu ne’ebé iha, Boxista na’in rua tenke joga durante ronde dala-haat maibé ho forsa – abilidade no tékniku ne’ebé Elídio iha, termina jogu iha ronde primeiru.
“Agora nia hetan ona kontratu tinan ida husi HSS, kada fulan nia simu ona osan husi HSS, maibé hira-hira ne’e konfidensiál, ita orgullu tanba luta durante tinan barak la saugati,” Abilio tenik.
Tanba hetan ona kontratu husi HSS, tuir Treinadór, Abílio Orlando dos Santos, iha 24-25 agostu, Elídio sei tuir kompetisaun Boxe ida iha Bali, Indonézia, iha ne’ebé Elídio sei hasoru Boxista profesionál husi Indonézia.
“Nia mós agora tama Bokrek ona. Ida-ne’e, oportunidade di’ak tanba nia bele promove liutan ita-nia nasaun,” Abílio haktuir.
Daudaun ne’e Elídio hetan previlejiu husi HSS atu hela iha Ótel gratuita, haan hemu gratuita tanba apoia másimu husi HSS.
“Nia kada fulan hetan osan hosi HSS, maibé nia atu hela iha Timor ou Indon’ezia ami sei ko’alia hela, depende ba sira, importante sira fasilita nia. Ita fiar katak nia sei hakat ba nível aas liu,” nia garante.
Agredese ba Maromak
Iha biban ne’e, Boxista Elídio da Conceição, hato’o agradesimentu ba parte envolvida sira iha nia jornada bokse nian to’o manan iha kompetisaun.
“Ha’u agradese tebes ba parte hotu, ohin loron ha’u haka’at tan pasu ida. Maibé, ho Maromak nia tulun mak ha’u haka’at ona ba oin”.
Iha jogu ne’ebé sei hala’o fulan oin iha Bali, Elídio dehan, halo hela preparasaun no garante sei manán hasoru adversáriu iha ronde primeiru ka segundu.
Koñese liután Elídio da Conceição
Elídio moris iha Lospalos, 06 jullu 2003, munisípiu Lautem. Oan husi Lino da Conceição no Esperança Vitoria Mendes. Elídio hanesan oan ba dala-neen husi maun-alin na’in hitu; feto rua no mane lima.
Elídio hahú envolve aan iha mundu Boxe iha tinan-2018 iha Munisípiu Lautem no iha tinan-2019 nia mai kontinua fali nia karreira Boxe iha Dili hamutuk ho klube El-Matador to’o ohin loron no hakatat ona ba Boxista profesionál.
Durante iha klube El-Matador, Boxista Elídio hala’o jogu hamutuk dala-20 ona. Husi jogu hirak ne’e, nia lakon de’it iha jogu tolu, iha eventu nasionál ne’ebé hala’o iha Dili nia lakon dala ida no iha internasionál lakon dala rua – ida iha Austrália, ida iha Sea Games. No, manán dala-17.
Eventu nasionál no internasionálhirak ne’ebé Elídio partisipa ona hanesan jogu iha Austrália iha tinan-2020, iha Kamboja iha tinan-2023 no iha tinan-2024 iha Indonézia.
Boxista raan maubere ne’e, la’ós joga de’it iha kilograma ida, maibé joga iha kilograma lima hanesan, 48, 51, 54, 55, 57. Maibé, iha tinan-2024 sai hanesan tinan osan-mean ba Boxista timoroan ne’e atu hakur ona ba kategoria profesionál.
Notísia relevante:Boxista Elidio despede ho Governu hodi bá kompete boxe profisionál iha Indonézia
Jornalista: Hortencio Sanchez
Editór: Rafael Ximenes de A. Belo
