KOVALIMA, 16 Maiu 2025 (TATOLI) –Kandidatu traballadór Austrália na’in-229 tuir teste entrevista iha edifísiu Estadu Formasaun Profesionál no Empreru (SEFOPE), iha munisípiu Kovalima.
Diretór SEFOPE Kovalima, Stefanus Segundu Manek, informa katak kandidatu traballadór Austrália ne’ebé mak daudaun ne’e tuir teste entrevista, sira durante ne’e tuir formasaun dalén inglés iha sentru formasaun akreditadu hosi SEFOPE
“Ba sira ne’ebé tuir formasaun dalén inglés iha SEFOPE sira halo teste entrevista finaliza ona, maibé daudaun ne’e fó teste ba kandidatu traballadór Austrália ne’ebé tuir formasaun dalén inglés iha sentru formasaun seluk tenke mai, ita tenke fó teste ba sira tanba dala ruma sira scan de’it sertifikadu”, Dirijente SEFOPE Kovalima, Stefanus Segundu Manek dehan ba TATOLI, iha Tabakolot, ohin
Formadór sira husi SEFOPE Kovalima fó teste entrevista ba kandidatu traballadór Austrália ne’e durante loron tolu ne’ebé hahú 14 Maiu ne’ebé finaliza ona iha 15 Maiu.
Dirijente SEPFOPE ne’e esplika, maske tuir oráriu ohin loron finaliza ona maibé SEFOPE nafatin fó oportunidade ba kandidatu traballadór Australia ne’ebé mak seidauk tuir teste entrevista.
Tuir regra husi SEFOPE kandidatu ne’ebé mak atu tuir teste sira tenke tuir formasaun durante fulan tolu hafoin sira mai tuir teste entrevista iha SEFOPE.
“Atu tama iha faze entrevista ita rekolla sira-nia dokumentu hafoin ita publika sai kandidatu traballadór sira foin mai tuir teste entrevista. Maibé, kona-ba bainhira mak atu fó sai rezultadu ida-ne’e seidauk hatene maibé importante sira-nia naran submete fali ba SEFOPE nasionál no kandidatu hetan ona númeru referénsia maibé haree valór di’ak ami asina submete ba foin bele kompleta sira-nia dokumentu”, nia dehan.
Kandidatu traballadór Austrália, Eduardo Martins reforsa katak kandidatu traballadór sira-nia prezensa iha SEFOPE atu tuir teste entrevista
“Ami atu tuir teste entrevista tanba durante ne’e ami tuir ona kursu dalén inglés iha sentru formasaun akredidatu husi SEFOPE durante fulan tolu”, nia reforsa.
Notísia relevante:SEFOPE entrega sertifikadu ba kandidatu traballadór Austrália na’in-255
Jornalista:Celestina Teles
Editór: Rafael Ximenes de A. Belo
