DILI, 16 Maiu 2025 (TATOLI)–Antigu-Primeiru-Ministru no atuál Sekretáriu Jerál Partidu FRETILIN, Marí Alkatiri, hateten bainhira iha selebrasaun restaurasaun independénsia ba da-23 ne’e, líder sira hotu la halo balansu ida atu hateke ba oin hodi hadi’a naksalak sira-ne’e mak fó terus nafatin ba povu sira.
Notísia Relevante: Governu aprova tema jerál “Hametin Pás no Dezenvolvimentu” ba komemorasaun 20 Maiu
“Se ita la halo balansu ida-ne’e atu hateke ba oin saida mak ita halo la di’ak hodi hadi’a, entaun ita tinan ba tinan parabéns, parabéns maibé prosesu dezenvolvimentu la la’o, povu sei mukit nafatin, povu sei halerik nafatin no ita hanoin katak sasán hotu la’o loos,” Sekretáriu Jerál Partidu FRETILIN, Marí Alkatiri, hateten ba Agência TATOLI iha Gabinete Eis-Titulár, Faról, sesta ne’e.
Antigu Primeiru-Ministru ne’e hatutan, selebrasaun 20 Maiu iha tinan ida-ne’e importante tebes tanba selebra ba tinan 23 no selebra mós tinan 51 ba kriasaun Asosiasaun Sosiál Demokrátika Timorense (ASDT, sigla portugés).
“Tinan ne’e importante tebes ba lideransa tomak jerasaun ba jerasaun atu hanoin atu bele kurije no hadi’a sasán sira-ne’ebé la loos, atu bele la’o tuir nafatin dalan ne’ebé loos,” nia hateten.
Entretantu, kona-ba tema jerál ne’ebé Governu hili ba selebrasaun 20 de Maiu tinan ne’e “Hametin pás no dezenvolvimentu” ne’e, la tuir implementasaun ne’ebé Governu halo.
Notísia Relevante: Governu gasta rihun US$500 komemora loron restaurasaun independénsia ba da-23
“Ita ko’alia buat ida, ita-nia hahalok buat seluk. Hametin pás, pás ne’e halo ho intendimentu, halo ho domin no diálogu, buka konsensu ba sasán bara-barak. Rai ne’e la’ós Governu nian de’it, rai ne’e povu maiória nian, la’ós partidu ida manán maiória dehan ninian. Ne’e labele, ne’e sala boot,” Antigu-Primeiru-Ministru ne’e hateten.
Nia hateten, dalabarak ema sempre akuza FRETILIN bainhira ukun hasai ema arbiru, maibé nia husu tenke halo peskiza kle’an tanba iha Governu Konstitusionál da-hitu (VII) nunka hasai ema ida no loke liman ba ema hotu.
“Sira akuza FRETILIN dehan uluk ukun hasai ema arbiru, ida-ne’e ema sira laiha kapasidade atu halo peskiza, haree FRETILIN nia tempu ukun ne’e inkluzivu ka la inkluzivu. Nunka, ha’u tama fali ba VII Governu ha’u-nia gabinete nakonu ho CNRT no PD, ha’u nein hasai ema ida, ha’u la hatama tan ema barak, so hatama ema rua de’it mak servisu ho ha’u iha Gabinete,” nia dehan.
Iha selebrasaun aniversáriu restaurasaun independénsia ba da-23 iha 20 maiu ne’e, Marí Alkatiri husu lider sira hotu presiza hamutuk halo reflesaun hodi halo balansu ba saida mak halo ona.
“Ha’u fó mensajen ida iha kontestu atuál, polítiku sosiál, ekonómiku, nune’e mak ha’u husu ba poder polítiku tomak Estadu Timor-Leste atu konsistente halo reflesaun boot ida ba tinan 23 ne’e, para ita hamutuk halo balansu ba saida mak ita halo ona, saida mak ita seidauk halo, saida mak ita atu hadi’a, saida mak ita atu hametin, saida mak ita atu haburas, saida mak ita atu habelar,” Alkatiri hateten.
Notísia Relevante: Restaurasaun independénsia ba da-23 nu’udar momentu reflesaun
Jornalista : Hortencio Sanchez
Editór : Cancio Ximenes
