VIKEKE, 20 Maiu 2025 (TATOLI)—Prezidente Autoridade Munisípiu (PAM) Vikeke, Francisco C.S de G. Soaresa, husu populasaun munisípiu Vikeke prepara aan no kolabora hamutuk hodi simu dezentralizasaun no poder lokál.
Notísia Relevante: Selebra 20 Maiu: Timoroan sira-nia konsiénsia nasionalista lakon tiha ona
Tanba, nia hatutan, se Vikeke hakarak avansa ho dezenvolvimentu ba oin entaun Vikeke-oan sira tenke servisu hamutuk hodi hateten lae ba zero violénsia no impedementu bainhira Gobvernu hakarak halo dezenvolvimentu iha Vikeke.
“Bázeia tema ba komemorasaun 20 Maiu ‘Hametin páz no dezenvolvimentu’, nune’e ha’u hakarak fó hanoin ba povu Vikeke katak tinan ida-ne’e ita lori dezenvovlimentu liuliu ba dezentralizasaun podér lokál. Tan ne’e, Vikeke hakarak avansa ba oin mai ita servisu hamutuk no kolabora hodi lori dezenvolvimentu ne’e ita tenke zero ba violénsia, disturbiu, anarkizmu no zero ba impedementu kuandu buat sira-ne’e akontese ita lahanoin ona ba dezenvolvimentu, maibé ita hanoin rezolve problema,” Prezidente Autoridade Munisípiu (PAM) Vikeke, Francisco C.S de G. Soares, hateten ba jornalista sira hafoin ramata serimónia isar bandeira ba komemorasaun loron restaurasun independénsia 20 Maiu (2002-2025) ba da-23, iha kampu futeból munisípiu Vikeke, ohin.
Tanba ne’e, nai dehan, Vikeke-oan sira tenke kontribui hodi asegura hakmatek no dame, nune’e bele lori dezenvolvimentu ba to’o iha nivél baze ka suku sira iha munisípiu Vikeke ne’e.
“Iha munisípiu Vikeke área potensialidade ba setór agrikultura, tanba ita-nia istória husi saudozu Nikolau Lobatu hakerek katak ‘Se timór ukun rasik aan Vikeke mak sai kabun ba munisípiu hotu-hotu’. Agora, ita ukun rasik aan ona, ita buka maneira oinsá para hasa’e pontensialidade setór agrikulura ba nesesidade kabun nasionál nian,” nia dehan.
Kona-ba infraestrutura bázika sira
Líder masimu munisípiu Vikeke ne’e hateten, ba tinan 2025 autoridade munisípiu Vikeke sei kolabora hamutuk Governu sentrál ba dezenvolvimentu estrada husi Asalaitula to’o munisípiu Vikeke, estrada husi postu Iliomar, munisípiu Lautein bá postu Uatukarbau, Uatulari, Lakluta no to’o munisípiu Manufahi ne’ebé Governu tau ona ba príoridade ba tinan 2026.
“Bázeia lei nú. 84, munisípiu ninia kompeténsia kaer orsamentu husi rihun $500 mai karik, entaun ba estrada nasionál Governu sentrál mak iha kompeténsia tau ba programa. Ho estrada nasionál sira-ne’e ita komunika ona nasionál katak dezenvovimentu sei la’o,” nia dehan.
Kona-ba dezenvolvimentu nia dehan, sei la’o fazeadamente hahú estrada hodi halo koneksaun husi fatin ida ba fatin seluk, nune’e mós poténsia agrikultór kuandu hasa’e ona ida-ne’e loke ona kampu servisu ba joven sira iha munisípiu Vikeke.
“Tanba ponténsia agrikultura ne’ebé ita identifikadu ne’e ita iha natar, toos, nuu no ikan ne’ebé bele lori ba merkadu. Tan ne’e, estrada mak sai fatór determinante ba setór agrikultura. Alende ne’e, ita Vikeke tinan ida-ne’e tau ona planu hodi konstrui armajen munisipál hodi rai produtu lokál,” nia dehan.
Preparasaun ba dezentralizasaun podér lokál
Ba preprasaun dezentralizasaun administrativa no podér lokál, nia dehan, autoridade munisípiu Vikeke halo ona preparasaun no tinan 2025 sei harii edifísiu kámara munisípiu ne’ebé mak sei konstrui iha suku Maluru no suku Uma Uain Kraik nia klaran.
“Ba preparasaun kondisaun ami identifika ona rai ba konstrusaun edifísiu kamara munisípiu ne’ebé iha baliza entre suku Maluru no Uma Karik. Ho objetivu ita atu espansaun sidade Vikeke nian tanba ne’e edifísiu ne’e área luan hodi responde ba nesesidade munisípiu nian,” nia hateten.
Iha fatin hanesan, Prezidente Konsellu Konbatente Libertasaun Nasionál (CCNL, sigla portugés), Adriano Camara “Lentil”, prefere ba Governu kontinua aselera no maske la’o maibé presiza aselera atu povu bele sente dezenvolvimentu.
“Ami haree dezenvolvimentu ba infraestura sira-ne’e la’o, maibé neineik liu tanba ne’e ami veteranu husu parte Governu aselera prosesu dezenvolvimentu iha munisípiu atu povu bele sente dezenvolvimentu,” nia hateten.
Tuir observasaun, Agência Tatoli nota katak selebrsaun 20 maiu ba serimónia isar bandeira ne’ebé iha munisípiu Vikeke la’o hakmatek no hetan partisipasaun husi komunidade, funsionáriu husi instituisaun públiku sira iha munisípiu Vikeke no hetan seguransa másimu husi Polísia Nasionál Timor-Leste (PNTL) munisípiu Vikeke.
Serimónia ne’e partisipa mós husi autoridade lokál, sosiadade sivil, komandante PNTL munisípiu Vikeke ho ninia estrutura, estudante, profesór, servisu saúde munisípiu, pesoál saúde, CVTL, padre parokia Vikeke no madre sira.
Notísia Relevante: Ukun aan tinan 23, povu seidauk sente dezenvolvimentu iha baze
Jornalista : Vitorino Lopes da Costa
Editór : Cancio Ximenes
