OEKUSI, 21 Maiu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), realiza kompetisaun Corrida Cavalo hodi festeza loron Restaurasaun Independénsia 20 Maiu ba dala-23, ho tema “Mai ita promove kultura kompetisaun corrida kuda nu’udar desportu komunitária iha Oekusi’.
Eventu ne’e, abertura husi Koordenadór Zona Ekonomi Espesiál Dezenvolvimentu Oekusi Ambeno (ZEEDOA), João Mendes Gonçalves, reprezenta Prezidente Autoridade RAEOA, enkoraza kuda na’in-sira atu hatudu dixipliña durante kompetisaun, nune’e bele hamosu unidade pás atu festeza loron independénsia 20 Maiu ne’e.
“Kuda na’in-sira, ha’u dezeju boa-sorte ba im. Karik balun manán ba, maibé sira-ne’ebé lakon, kontinua esforsa ba oin bele hetan oportunidade tanba eventu ne’e atu harame ita-nia loron independénsia, nune’e husu kuda na’in-sira, kolabora no respeitu malu, tanba desportu tenki iha lakon no manán, maibé save mak unidade tenke hamutuk, labele diskrimina malu,” nia fó hanoin.
Notísia relevante:PR Horta sei ko’alia ho Governu atu fó apoiu haki’ak kuda
Iha fatin hanesan, Prezidente Asosiasaun Corrida Cavalo Oekusi Ambeno (ACCOA), Mario Muni Salu, informa katak kuda halai taru hamutuk 38 ne’e inklui kuda inan-haat, mai husi sub-rejiaun haat, mak partisipa iha eventu desportu komunitária ne’e, hodi fahe ba klase haat ho sistema lakon, ne’ebé nia finalidade sei termina iha loron sesta, 23 Maiu.
“Orsamentu ne’ebé apoia husi Governu sei fó prémiu ba kuda 30, ne’ebé ami agradese ba Autoridade RAEOA tanba konsidera kuda halai tarru nu’udar eventu tradisionál atu fó ksolok ba inan-aman sira liuliu haki’ak kuda,” Mari Muni Salu, informa iha ámbitu abertura, hala’o iha suku Cunha, sub-rejiaun Pante Makasar.
Iha fatin hanesan, Prezidente Komisaun Organizadora ba 20 Maiu, Andre La’o, atuál Sekretáriu Rejionál ba Asuntu Administrasaun informa tinan ne’e, Autoridade RAEOA aprova orsamentu rihun $72.
Orsamentu ne’e, atu koloka sub-rejiaun haat inklui atividade desportu sira hanesan, kompetisaun kuda halai taru, futeból no futeból salaun ba feto no mane, voleibáll feto mane, inklui dada tali no sa’e buah.
“Eventu kuda ne’e iha premiu iha osan itoan, atu motiva liutan kuda na’in-sira, tanba hein kelur ona, dezde 28 Novembru agora mka foin loke fali, ne’ebé autoridade RAEOA liuhusi Prezidente Autoridade deside ona katak, kada tinan sei hala’o dalarua, atu kuda na’in-sira bele badinas haki’ak kuda, tanba ikus ne’e kuaze atu lakon tanba maioria sa’e motor de’it,” nia dehan.
Entretantu, atividade kompetisaun coriida cavallo ne’e, hetan apoia husi Autoridade RAEOA, Minsitériu Solidariedade Sosiál no Inkluzaun (MSSI) no kompañia lokál Falo Kaba Unipesoál Lda.
Notísia relevante:Partisipante korrida cavalo Oé-Cusse lamenta tanba seidauk simu prémiu
Jornalista: Abílio Elo Nini
Editór: Florencio Miranda Ximenes
