BOBONARU, 21 Maiu 2025 (TATOLI)—Jestór Eletrisidade Timor-Leste, Empreza Públika (EDTL, E.P) delegasaun territoriál Munisípiu Bobonaru, Mário de Jesus Soares, hateten Prezidente Konsellu Administrasaun EDTL, E.P hatun ona orientasaun atu halo instalasaun liña eletrisidade kobre hotu aldeia hirak ne’ebé to’o agora seidauk asesu enerjía elétrika.
Notísia Relevante: Tempu badak, EDTL sei implementa PEK ba aldeia haat iha Bobonaru
Nia konfirma, aldeia ne’ebé sai alvu atu kobre Projetu Eletrifikasaun Nasionál (PEN) no Projetu Eletrifikasaun Komunitária mak aldeia Raifun-Foho, suku Raifun, postu administrativu Maliana, aldeia Aidabaslala no bairru rua iha suku Hataz, postu administrativu Atabae, postu administrativu Balibo sub-aldeia ida.
Iha postu administrativu Kailaku área Berleu, aldeia Liabote, Mude no postu administrativu Bobonaru aldeia Beamuas no Lodasi, suku Kolimau ho aldeia Galitaz no Olo-Olo iha suku Lour, inklui aldeia Oburo, suku Deudet, postu administrativu Loloto’e, maibé sei instala de’it solár-panel tanba liña do’ok husi knua.
“Aldeia sira-ne’ebé mak seidauk asesu liña eletrisidade karik, ami iha tarjetu ida, tinan ida-ne’e ami-nia ezekutivu, prezidente fó sai ona katak iha tinan ne’e aldeia iha ida-idak nia munisípiu tinan ida-ne’e atu konklui hotu. Ne’ebé, iha munisípiu Bobonaru iha aldeia lima ka neen hanesan ne’e mak seidauk asesu eletrisidade, ne’ebé labele laran taridu ami sei esforsu nafatin, para tinan ida-ne’e, ita-boot sira mós bele hetan enerjia elétrika hanesan sira seluk,” Nia informa ba Agência Tatoli, iha nia kna’ar fatin, kuarta ne’e.
Jestór ne’e afirma, adeia ne’ebé daudaun ne’e iha ona faze atu implementa Projetu Eletrifikasaun Komunitária mak hanesan aldeia Holbese, suku Leber ho totál uma kain 32 no sub-aleia Letorasi, aldeia Purugua, suku Ilat-laun.
Aleinde ne’e, nia informa, sub-aldeia Fatuk-Leten aldeia Odelgomo ho totál uma kain 56 no aldeia Laho ho totál uma kain hamutuk 29 mak seidauk asesu liña eletrisidade.
“Ida-ne’e ninia karta despaixu tun tiha ona no ninia materiál ami rekiza tia ona, segunda ba oin ha’u koloka ona pesoál sira ba ona iha terrenu ne’ebá,” nia hateten.
Mário subliña, daudaun kompañia implementadór sira implementa hela Projetu Eletrifikasaun Nasionál (PEN) pakote rua ida iha postu administrativu Bobonaru no ida iha postu administrativu Kailaku.
Jestór ne’e hatutan, pakote ida iha suku Ai-Asa, iha aldeia rua hanesan Mazop no Odelgomo asesu ona eletrisidade iha fulan ida liubá, enkuantu ba aldeia Mabelis no Leber-Taz iha suku Leber progresu fíziku atinje ona 15%.
Aliende ne’e, pakote ida iha postu administrativu Loloto’e empreza sira implementa ona projetu ba uma kain 1000-resin ne’ebé pertense ba aldeia Anon no Guda-Taz, suku Guda, parte suku Opa aldeia Tepa no Hol-lak no suku Lupal aldeia Silagolo ho Dilai, enkuantu obra hirak ne’e kuaze atinje ona 50% tanba ai-rlin hamrkik hotu ona.
“Ha’u husu komunidade ne’ebé liña kobre ona, tantu sira-ne’ebé mak seidauk kobre atu uza ahi tuir ninia regra. Labele loron mós halo ahi ne’e lakan hela de’it, tanba ita-nia sentrál elétrika iha Hera ne’ebá hanesan Naha ida karik todan hela de’it, entaun uza ahi se rai-loron karik lampu la uza bele halo mate, atu nune’e bele fó kma’an ba ita-nia jeradór rua ne’ebé fornese enerjía ba ita nia nasaun ida-ne’e,” nia dehan.
Enkuantu, tuir dadus ne’ebé Tatoli asesu husi EDTL, E.P munisípiu Bobonaru hatudu katak kliente ne’ebé asesu ona enerjía elétrika hamutuk rihun-18.
Notísia Relevante: EDTL, E.P hahú instala eletrisidade ba aldeia neen iha Loloto’e
Jornalista : Sergio da Cruz
Editór : Cancio Ximenes
