OEKUSI, 23 Maiu 2025 (TATOLI) – Prezidente Repúblika (PR), José Ramos Horta, akompaña husi Ministru Agrikultura Pekuária, Peska no Floresta (MAPPF), Marcos da Cruz, no Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, sesta ne’e, kolleta hare membramo ektare 52 iha suku Lifau, sub-rejiaun Pante Makasar.
Natar ektare 52 ne’e, rezultadu husi aplikasaun adubu orgániku Ako’y Magsasakang Orgániku (AMO), ne’ebé antes ne’e Autoridade RAEOA liuhusi Sekretária Rejionál Asuntu Agrikultura, simu sosa husi Empreza JJEA Agriventures.CO husi nasaun Filipina ho kustu rihun $600 ho objetivu atu hasa’e produsaun agríkola no hamate peste iha natar no to’os.
“Ha’u mai tanba konvite husi Prezidente Autoridade RAEOA, mai nu’udar testamuña, haree susesu bo’ot, ita kolleta hare ho produtu foun, fertilijante naturál, no hetan rezultadu di’ak tebes, tanba iha relatóriu katak, liu tonelada haat kada ektare, no bele to’o tan tonelada 6 kada ektare, ne’e primeira-véz iha Oekusi, ita haree komunidade sira barak agora adere fila-fali ba vida agrikultura,”
Notísia relevante:Agrikultura Oekusi rega adubu orgániku AMO ba natar ektare 52
Tan ne’e, Xefe Estadu fó parabéns no enkoraja ba Autoridade RAEOA ho Ministériu Agrikultura, apela ba agrikultór sira, tenki ho apoia nafatin husi Estadu, atu kontinua haka’as an, tanba agrikultura la’o hare de’it maibé iha produtu seluk tan, maibé importante liu mak kondisaun rai tenki bokur no presiza mós tau matan ba irigasaun sira atu kontinua fornese bee ba natar sira.
Ministru Agrikultura Pekuária, Peska no Floresta (MAPPF), Marcos da Cruz, introdus kona-ba koa haree ho mákina, nu’udar polítika MAPPF atu halo modernizasaun ba setór agrikultura.
“Ohin ita koa hare oin rua, ho maneira tradisionál koa uza tudik no modernu uza mákina, tanba ita hahú moderniza ita-nia setór agrikultura, ho sistema mekanizasaun, ita introdús mákina ne’ebé modernu, atu ajuda ita-nia agrikultór sira, atu hakmaan sira-nia sira, redús kustu operasaun no redús ita-nia kolen, tanba koa ho sistema tradisionál lakon tempu, no mós lakon osan selu ema hodi ajuda, tan ne’e ami agradese ho Prezensa Prezidente Repúblika, nu’udar ondra bo’ot ba setór agrikutura atu kontinua reforsa liu tan,” nia dehan.
Notísia relevante:Autoridade RAEOA sosa adubu orgániku AMO hodi hasa’e produsaun agríkola
Iha biban ne’e, Prezidente Autoridade RAEOA, Rogerio Tiago Lobato, esplika, kona-ba utilizasaun adubu organiku AMO, daudaun ne’e agrikultór sira barak mak utiliza iha natar sira, nune’e bele hasa’e produtividade no hamate mós peste lakataru.
“Natar ektare 52 ne’e, rezultadu produtividade ne’e sa’e husi tonelada 2,5 kada ektare ba tonelada 4,9, ne’e tanba uza adubu organiku AMO, adubu ne’e mós bele hamate peste, ne’ebé oras sirkula iha iha agrikultór sira, hodi uza ba natar sira, tanba produtidade sa’e maka’as, ”
Notísia relevante:PA RAEOA lansa adubu orgánika hasa’e produsaun no hamate Lakataru
Jornalista: Abílio Elo Nini
Editór: Florencio Miranda Ximenes
