MANATUTU, 24 Maiu 2025 (TATOLI) – Ministru Juventude,Desportu Arte no Kultura (MJDAK), Nelyo Isaac Sarmento, hateten Governu hakarak lori futeból besik liu ba komuniade sira atu dezenvolve talentu juventude sira nian maske kondisaun infrastrutura iha Munsípiu balun seidauk iha kondisaun.
“Ha’u hakarak dehan
dezenvolve futeból ita hakarak la’o ba Munisípiu hotu, ida ne’e mak polítika ida ne’ebé mak ohin ita hanoin lori futeból ba Munisípiu maske iha Munisípiu balun nia kondisaun infrastrutura seidauk kompleta,” Ministru Nelyo hateten bainhira halo abertura ba Liga Futeból Timor-Leste (LFTL) iha Estádiu Munisipál Manatutu, sabádu loraik ne’e.
Notisia relevante:Manán SLB Laulara, Karketu Dili rekolla pontu tolu ho golu mihis
Nia dehan, Manatutu hetan previlejiu ida tanba abertura ba Liga Timorense bele realiza iha Munisípiu referidu.
“Ne’e previlejiu ida ohin ita bele hala’o abertura ba Liga Timorense Primeira Divizaun iha Munisípiu ida ne’e, primeira vez ba Manatutu, ida ne’e atu hatete katak, komesa ohin ba oin kampu ida ne’e sei akontese jogu barak liutan,” Ministra Nelyo tenik.
Iha okaziaun ne’e, Ministra Nelyo relata ba autoridade reguladór futeból Timor-Leste inklui Liga Futeból Timor-Leste katak, Governu nia responsabiliade mak fó apoiu másimu mak finansiamentu no infrastrutura ne’ebé bele hala’o jogu.
Bainhira ko’alia kona-ba regulamentu organun futeból mak iha responsabilidade no husu ba klube hotu ne’ebé kompete iha liga ne’e atu kumpre regulamentu hotu ne’ebé Federasaun Futeból Timor-Leste (FFTL) no LFTL fó sai, tanba husi regulamentu mak lori jogadór sira bele respeita malu, responsabiliade ba jogu no sai ezemplu ba futuru jerasaun foun sira tuir mai.
LFTL agradese Governu
Iha fatin hanesan, Prezidente LFTL, Ipolito Soares agradese ba Governu no FFTL ne’ebé apoiu ona orsamentu ba LFTL hodi realiza liga époka 2025.
“Iha biban ne’e, hakarak agradese ba Governu ne’ebé mak ajuda fundu mai ita hodi realiza ita nia liga futeból Timor-Leste, la haluha agradese mós ba ita nia FFTL ne’ebé ajuda mós fundu mai ita,” Ipolito dehan.
Alende ne’e, nia agradese mós ba Prezidente Autoridade Munsípiu Manatutu Luis Fernandes ne’ebé ofrese ona Estádiu ba LFTL realiza liga durante fulan hira nia laran.
Iha sorin seluk, Prezidente Autoridade Munisípiu Manatutu, Luis Fernandes agradese ba FFTL, LFTL no Governu bele hili ona Manatutu hodi halo abertura ba liga futeból no hala’o jogu durante fulan hira nia-laran.
“Agradese tebes ba FFTL, Governu no Liga bele hili Manatutu hodi halo abertura ba jogu liga nian, ita hatene katak kampu ne’e seidauk inaugura maibé tanba nesesidade mak ita realiza ona jogu,” nia dehan.
Tuir, Prezidente Autoridade ne’e, importante bele hamoris ona futeból iha Manatutu ne’ebé durante ne’e maten loos no atu motiva joven sira iha Munisípiu ne’e.
MJDAK apoia osan rihun $500.000 ba LFTL
Rekorda fali katak, Iha loron 16 fulan-Maiu, Orgaun ezekutivu LFTL hala’o reuniaun ho Prezidente klube Primeira no Segunda Divizaun iha sala reuniaun LFTL Dili, deskute no apresenta planu orsamentu, ba klube Primeira no Segunda Divizaun Liga Timorense epoka 2025.
Nune’e, Orgaun Liga Futeból Timor-Leste asina ona ASH ho Governu liu husi MJDAK ho total rihun $500.000, nebe’e transfere uluk ona 50%.
No orsamentu husi FFTL ate agora seidauk iha serteza nia laran, tamba ne’e Orgaun Liga Futebol Timor-Leste prepara no halo planu orsamentu baseia ba orsamentu ne’ebé fixu, asina ona ASH, ho MJDAK.
Maske seidauk iha akordu ho FFTL maibé tuir karta husi FFTL ba LFTL katak bainhira Kick off FFTL sei manda uluk osan 35%, husi orsamentu rihun $200.000 ne’ebé FFTL atu fó ba LFTL. Bainhira jogu rimeira volta Remata maka foin amenta tan 15%.
Ba klube ne’ebé mak Kampiaun primeira divizaun Liga Timorense epoka ida ne’e, sei hetan rihun $25.000 diferente ho antes ne’e dolar rihun $15.000. No Premiu ba kampiaun segunda divizaun sei hetan rihun $10.000.
Notisia relevante:Abertura liga futeból TL: SLB Laulara-Karketu Dili sei doko Estádiu Manatutu
Jornalista: Hortencio Sanchez
Editor: Florencio Miranda Ximenes
