Abertura liga futeból TL: SLB Laulara-Karketu Dili sei doko Estádiu Manatutu

DILI, 23 Maiu 2025 (TATOLI)–Liga Futeból Timor-Leste (LFTL) sei halo abertura ba jogu dahuluk entre klube Primeira-Divizaun husi ekipa futeból AD. SLB Laulara no Karketu Dili FC, iha Estádiu Munisipál Manatutu iha loron sabádu (24 Maiu 2025) ne’e.

Notísia Relevante: Klube Primeira Divizaun sei simu $30.000 durante liga la’o

Duelu entre akipa rua ne’e sei iha intensidade jogu ne’ebé maka’as tanba durante tinan tolu resin Timor-Leste laiha liga profesionál iha rai-laran, no estádiu Manatutu sei sai hikas sasin ba futeból Timor-Leste buras hikas.

Treinadór ekipa SLB Laulara, Efrem dos Santos hateten prontu atu kompete iha jogu kontra Karketu Dili no SLB Laulara sei avansa de’it ho jogadór lokál.

“Ami preparadu atu joga iha aban. Ami trsite uitoan tanba la’o de’it ho jogadór lokál, maibé iha jogu tuir mai ami sei hatama tan jogadór internasionál rua hanesan ne’e,” Efrem hateten liuhusi konferensia imprensa ne’ebé hala’o iha edifisiu LFTL Kaikoli, sesta ne’e.

Nia dehan, maske SLB avansa ona ba jogu primeiru maibé SLB nia jogadór prinsipál hanesan Mouzinho Barreto de Lima seidauk bele inklui tanba sei iha hela estranjeiru.

“Ami-nia jogadór balu mós seidauk kompletu tanba Mouzinho seidauk mai. Nia mai ne’e, nia sei joga iha SLB, Ami nia jogadór estranjeiru na’in-rua iha hela prosesu mak jogadór ida husi Rusia no ida seluk maihusi Colombia,” Efrem tenik.

Nia hatutan, maske avansa de’it ho jogadór lokál maibé desizaun hotu termina iha minutu 90m bainhira jogu la’o no alvu mak tenke manán hodi hadau pontu tolu.

Iha sorin seluk, treinadór Karketu Dili FC Bernard Teye afirma, Karketu prontu ona atu hakat ba kompetisaun.

“Karketu preparadu ona, jogu aban mak ita sei haree maibé ami-nia objetivu mak tenke manán iha jogu ne’e,” treinadór ne’e dehan.

Entretantu, tuir dadus ne’ebé iha jogadór hamutuk 259 mak sei kompete iha epoka 2025 no husi númeru ne’e mai husi klube 10 ne’ebé hamahan aan iha LFTL Primeira Divizaun.

Husi totál jogadór 259 ne’ebé kompostu husi jogadór nasionál hamutuk 215 no jogadór estrangeiru hamutuk 44 ne’ebé mai husi nasaun ne’ebé diferensa.

Jogadór estranjeiru 44 ne’ebé kompostu husi nasaun neen (6) mak hanesan husi Indonesia na’in 24, Ghana 12, Japaun tolu (3), Kamerun rua (2), Pantai Gade rua (2) no Nigeria ida (1).

Notísia Relevante: Prezidente LFTL husu Governu nia partisipasaun iha liga tenke másimu

Jornalista : Hortencio Sanchez

Editór        : Cancio Ximenes