MANATUTO, 24 Maiu 2025 (TATOLI) – Ekipa istimadu husi kapitál Dili alias Karketu Dili FC susesu konkista nia vitória dahuluk iha abertura Liga Futeból Timor-Leste (LFTL) bainhira manán nia adversáriu Makikit Laulara aliAs AD SLB ho rezultadu golu mihis eskore 1-0, iha Estádiu Munisipál Manatuto, Sábadu loraik.
Vitória ne’e lori Karketu lidera provizóriu tabela klasifikasaun LFTL ho pontu tolu no golu ida.
Notisia relevante:Abertura liga futeból TL: SLB Laulara-Karketu Dili sei doko Estádiu Manatutu
Tuir kultura futeból nian, bainhira jogu hahú dirije husi árbitru no bainhira fó orientasaun liuhusi hú árbitu, ekipa rua lansa kedan kontra no atake ba malu tuir tékniku no abilidade ekipa ida-idak nian ne’ebé orienta ona husi treinadór.
Iha kampu matak ne’ebé infeta ho duut sai fatin furak ba jogadór sira pasa bola ba mai hodi buka hatama golu, ne’ebé adeptu atus ba atus tuur nahe-aan iha tribun estádiu nian hodi hakilar fó suporta másimu ba sira nia ekipa favoritu.
Jogadór sira nia roupa tenke habokon ho kosar hodi hatudu katak ida ne’e sira nia esforsu rasik, antes to’o iha titulu kampiaun la’ós buat ne’ebé fasil, maibé sosa uluk ho sofrimentu. Sofrimentu luta nian, sofrimentu ida ne’ebé difisil tanba iha kampu laran la’ós halimar, luta ida ne’ebé perigozu mós ba jogadór sira nia vida.
Iha jogu ne’e, SLB lansa atake ne’ebé adekuadu ba Karketu, maibé atake hirak ne’e sei hetan salvasaun husi jogadór Karketu, sutu balu avansadu SLB nian lansa maibé sutu hirak ne’e hela de’it hanesan sutu tanba seidauk kona iha alvu.
Karketu halo adaptasaun no tenta atu hamate SLB nia jogu, maibé defeza SLB nian sei sólidu halo Karketu susar atu ultrapasa, avansadu Karketu nian lansa sutu maibé sutu hirak ne’e seidauk kona iha tarjetu, ho forte entre ekipa rua nian maka’as halo jogu sai manas liutan no rezultadu nafatin termina ho 0-0.
Minutu la’o ba oin, duelu entre ekipa rua la’o ho intensiade aas ba-bebeik, Karketu halo presaun ho ambisaun atu prodús golu maibé la konsege tanba defeza SLB la fó fatin ikus Karketu seidauk bele realiza nia tarjetu.
Ho forsa ne’ebé la diferente halo ekipa rua ne’e tenke termina jogu iha minutu primeira parte ho rezultadu ho rezultadu empata 0-0.
Haku’ur ba segunda parte ekipa rua kontinua kontra atake ho estratejia foun oinsa bele ense golu no manán jogu referidu.
Karkeru nunka nonok, jogadór sira esforsu halo servisu maka’as iha kampu laran, lansa sutu husi ain ba ain, pasa ho kalma, avansadu Daniel Adadi hetan oportunidade barak iha minutu 46 ba leten, maibé oportunidade hirak ne’e hela de’it hanesan oportunidade tanba sutu hotu seidauk kona iha alvu.
Maske Karketu halo presaun maka’as hasoru SLB, klube Laulara ne’e la nonok, tenta halo presaun hodi hamate Karketu nia jogu, maibé presaun hirak ne’e hela de’it hanesan presaun tanba defeza Karketu nian solidu no metin tebes.
Ho jogu solidu ne’ebé Karketu iha to’o minutu 48, jogadór Assumany Maxuell (7) konsege simu bola pasa aas ida husi nia kolega Claudio Osorio (18) no Maxuell konsege utiliza nia ulun hodi baku tama bola ba liu rede laran halo guarda rede SLB Filonito Nogueira (12) la konsege antisipa.
Husi golu ne’ebé prodús husi jogadór Afrikanu ne’e lori kedan Karketu lidera provizóriu jogu ho rezultadu 1-0.
Maske sofre ona golu ida, SLB kontinua luta ho másimu oinsa atu responde golu ruma atu halo empata jogu ne’e, maibé defeza Karketu blokeia metin no la fó oportunidade ba SLB atu responde golu to’o minutu 90 normal termina laiha tan golu ruma mak akontese no Karketu mak iha direitu absoluta ba pontu tolu no SLB tenke simu derrota ho pontu zero.
Jogu ne’e lidera husi árbitru prinsipál Francisco Pereira, juiz liña Antonio Carvalho, Henrique Pereira no árbitru rezerva Pedro Braga.
Jogu ne’e mós sai hanesan momentu espesiál ida basa asiste direita husi Primeiru-Ministru Kay Rala Xanana Gusmão ne’ebé hanesan mós Prezidente ba klube SLB.
Prezensa Xanana Gusmão nian halo Estádiu Manatutu sai rame liutan tanba adeput barak SLB tantu Karketu animadu hodi hakilar simu Xanana Gusmão iha tribun leten.
Notisia relevante:LFTL taka ona janela transferénsia ba klube Primeira Divizaun
Jornalista: Hortencio Sanchez
Editór: Florencio Miranda Ximenes
