DILI, 23 Maiu 2025 (TATOLI)—Institutu Nasionál Saúde Públika Timor-Leste (INSP-TL), sesta ne’e, hala’o semináriu ba konsulta preliminária kona-ba rascunho do quadro de garantia da qualidade ba servisu formadór sira.
Diretór Kontrola ba Kualidade hosi INSP-TL, Fransisco Godinho, semináriu ne’e ho objetivu ba Quality Assurance Framework, ne’e nia kontinuasaun hosi hosi fulan Janeiru nian, nune’e ohin loron ne’e sira halo debate atubele hetan imput ruma hosi parseira sira no diresaun sira hosi INSP-TL rasik no diresaun sira seluk hodi hetan rezultadu ne’ebé mak di’ak.
“Iha Assurance Framework ne’e ami foka liubá iha formasaun ne’ebé mak durante ami haree formasaun la’o maka’as, nune’e bele atinje ba formatu sira-ne’ebé mak durante ne’e parseria ho ita. Ami-nia programa ohin loron ami sei halo prelimináriu ne’ebé mak ami foti imput no atinje hodi aprezenta nune’e bele uza ba área formasaun sira liuliu iha Timor Laran tomak,” Fransisco Godinho dehan ba jornalista sira, iha salaun INSP-TL, Komoro.
Nia hateten, bainhira formadór sira uza módulu ne’e, aban-bainrua sei kontinua hadia di’ak liután sira-nia servisu, no iha programa sira seluk mak jestaun lideransa ne’ebé mak iha tempu badak sei realiza iha Rejiaun Administrativu Espesiál Oekusi Ambenu (RAEOA).
“Iha módulu ne’e ami foka liubá formadór sira liga ba planementu familiár. Ida-ne’e ita uza liubá iha monitoring no mós halo observasaun. Iha mós formasaun saúde públiku nian ami sei uza hotu formatu ida-ne’e, no programa sira seluk mak jestaun lideransa ne’ebé mak iha tempu badak sei realiza iha Rejiaun Administrativu Espesiál Oekusi Ambenu (RAEOA),” Francisco informa.
Nia haktuir, bainhira módolu ne’e ramata ona, pesoál saúde sira sei uza módulu ne’e iha sentru saúde, postu saúde no ospitál referrál sira, nune’e pesoál saúde sira bele fó atendimentu tuir módolu ne’ebé mak iha.
Iha fatin hanesan, partisipante Gregório Rangel, reforsa semináriu ne’e atu konsulta partisipante Assurance Framework, relasiona ho organizasaun, formasaun, edukasaun no kualidade atendimentu.
Entretantu, partisipa iha semináriu ne’e hamutuk ema na’in-50, ne’e mai hosi Ministériu Saúde, INSP-TL no Hospital Nacional Guido Valadares (HNGV).
Jornalista: Felicidade Ximenes
Editór: Xisto Freitas da Piedade
