OEKUSI, 26 Maiu 2025 (TATOLI) – Institutu Nasionál Saúde Públika Timor-Leste (INSPTL), fasilita formasaun ba profisionál saúde hamutuk na’in-25 kona-ba imunizasaun iha prátika ne’ebé hala’o iha sentru saúde, postu saúde inklui Ospitál Referál Oekusi.
Formadór ba Área Formasaun Imunizasaun iha INSPTL, Caetano Gusmão, esplika, formandu na’in-25 ne’e mai husi sentru saúde lima iha Oekusi, postu saúde inklui mia husi Ospitál Referál Oekusi, ne’ebé realiza durante loron lima tutuir malu, hahú segunda 26 sei termina iha loron sesta 30 Maiu.
Notísia relevante:INSPTL-PHD eleva koñesimentu parteira na’in-45 iha Oekusi
“Formasaun ne’e ba imunizasaun iha prátika, ne’e tékniku klínika nian, ho nia materia ne’ebé iha hamutuk modúlu hitu, mak sei hala’o iha formasaun loron lima, ba profisionál saúde sira-ne’ebé, servisu iha sentru saúde, postu saúde no ospitál referál,” nia dehan iha otél Inur Sakato, Oekusi, ohin.
Nia esplika, tuir prosedimentu ne’ebé iha INSPTL, bazea dekretu-lei númeru 84/2022, INSPTL iha papél atu fasilita formasaun no peskiza, liuliu área formasaun ne’e sei fornese sertifikadu ba formandu sira, nune’e bele uza atu mellora karreira servisu iha sistema saúde.
Iha biban ne’e, Sekretáriu Rejionál ba Asuntu Saúde, Luís de Jesus Neno, konsidera formasaun importante, atu eleva koñesimentu ba profisionál sira, nune’e bele hadi’a di’ak liutan atendimentu liuliu imunizasaun iha servisu fatin.
“Formasaun ne’e importante tanba durante ne’e ita iha kazu, seidauk rejista mate mak kazu hanesan, dalaruma sona oan sira, depois fatin sona ne’e bubu no kanek, tan ne’e mak ita faasilita formasaun, nune’e sira bele hala’o servisu ho profisionál, tenki atende labarik sira ho di’ak no justu tuir matadalan saúde nian, hahú kedas husi vasinasaun, tenki rai iha fatin temperatura di’ak, no tenki hatene labarik ne’ebé mak merese atau hetan imunizasaun,”. Nia dehan.
Tanba ne’e, nia apela ba formandu sira durante formasaun presiza kumpre pontualidadeatu tama no sai kumpre oras, hatudu dixipliña, nune’e durante loron lima bele hetan koñesimentu foun no klean atu hatudu iha servisu fatin.
Notísia relevante:Janeiru to’o Maiu, Saúde Oekusi rejista inan isin-rua mate iha ospitál
Jornalista: Abílio Elo Nini
Editór: Florencio Miranda Ximenes
