MESSK halo inspesaun ba prosesu aprendizajén iha DITKREO
OEKUSI, 26 maiu 2025 (TATOLI)-Ekipa hosi Ministériu Ensinu Superiór Siénsia no Kultura (MESSK), segunda ne’e, halo inspesaun no monitorizasaun ba prosesu ensinu aprendizajén klase paralelu iha Dili Institute of Technology (DIT), Kampus Rejionál Oekusi Ambeno (DITKREO) la’o di’ak.
Xefe Departamentu ba Ensinu Superiór Universidade MESSK, Angelica Delfina de Araújo esplika, objetivu halo monitorizasaun no inspesaun ba klase paralelu DITKREO ne’e hodi rekolla informasaun sira bazea ba atividade ne’ebé estabelese ona iha DIT.
“Ita mai atu rekolla informasaun sira kona-ba atividade sira-ninia progresu iha tinan ne’e, saida mak atinje ona, ita halo bazeia ba dekretu lei númeru 68/2022, loron 14 fulan-setembru, iha artigu 17 ne’ebé prevista kompeténsia Governu liuhusi Ministériu Ensinu Superiór,” nia hateten ba jornalista sira iha Oekusi.
Notísia relevante:MESSK sei avalia UNPAZ no DIT loke klase paralela iha Oé-Cusse
Nune’e iha dekretu lei númeru 56/2023, loron 06 fulan-setembru, iha artigu 15 fó kompeténsia ba Diresaun Nasionál Ensinu Superiór, atu halo monitorizasaun ba atividade sira-ne’ebé estabelese iha ensinu superiór públiku no privadu hodi eleva kualidade ensinu superiór.
“Tanba ne’e ita mai hamutuk ho Magnífiku Reitór DIT, atu haree saida mak progresu iha tinan ne’e nia laran, ami haree iha atividade sira-ne’e la’o di’ak iha progresu di’ak tebes nune’e ami ho instituisaun servisu hamutuk atu eleva kualidade ensinu superiór. Ami ekipa husi MESSK labele apela ba ensinu superiór ne’e maibé ami sei elabora ba reitór ho ninia estrutura sira mak reitór foin aprezenta ba iha ministériu,” nia hatutan.
Iha fatin hanesan Reitor DIT, Salustiano dos Reis Piedade hateten, kada tinan ekipa MESSK hala’o vizita bá DITKREO ne’e importante atu fó motivasaun ba ekipa nune’e bele dezenvolve di’ak liután instituisaun ne’e iha futuru.
“Ami kontente tanba depois de monitorizasaun ne’e ami bele hadi’a ona ami-ninia frakeza no fallansu sira ne’ebé iha liuhosi rekomendasaun liu-liu kona-ba parte monitorizasaun nian. Ida-ne’e ita kontente tebes tanba bele servisu hamutuk ho MESSK,” nia dehan.
Dili Institute of Technology (DIT), Kampus Rejionál Oekusi Ambeno (DITKREO), daudaun ne’e iha fakuldade rua.
“Departmentu haat ne’e, mak agora daudaun ami la’o hela iha Oekusi planu atu aumenta maibé sei haree bazea ba monitorizasaun husi MESSK, daudaun ne’e ekipa mai hala’o hela, ne’ebé kritéria balu tenke priénse mak kada departamentu iha estudante minimál na’in-25 ida ne’e mak kritéria ne’ebé MESSK estabelese ona hodi la’o tuir entaun daudaun sei la’o uluk ho departamentu haat ne’e depois mak hanoin hodi aumenta tan iha futuru,” nia esplika.
Notísia relevante:MESSK husu Prezidente ANAAA foun avalia kursu iha IES ho rigór
Entretantu, totál estudante ne’ebé daudaun ne’e hala’o hela sira-ninia estudu iha DITKREO hamutuk 180 ho dosente hamutuk na’in-14.
Jornalista: Abílio Elo Nini
Editór: Floréncio Miranda Ximenes
