BOBONARU, 27 Maiu 2025 (TATOLI)—Diresaun Nasionál Transporte Terrestre (DNTT) delegasaun territóriu Munisípiu Bobonaru, durante ne’e enfrenta problema kona-bá espasu la sufisiente atu arkiva no asegura dukumentu fíziku husi rezultadu atividade Inspesaun Transporte, karta kondisaun, dokumentu ne’ebé sai baze ba transporte hotu no invoice ne’ebé komunidade entrega hafoin selu iha Banku Nasionál Komérsiu Timor-Leste (BNCTL sigla Portugés).
Diretór DNTT Munisípiu Bobonaru, Tomas Maia, konfirma dokumentu hirak ne’e asegura hamutuk no obrigatóriu balun tenke asegura de’it iha azulezu leten hodi fasilita ekipa auditoriá halo inspesaun no rekolla dadus husi atividade ne’ebé DNTT halo liga ho reseita.
Notísia Relevante: DNTT Bobonaru rekolla reseita $46-resin ba kofre Estadu iha trimestre dahuluk
“Durante espasu laiha ne’e ami halo jestaun kesi tuir fulan, kesi tuir item, balun ami tau iha armáriu, balun tau iha azuleizu de’it tanba fatin la sufisiente,” Diretór DNTT, Munisípiu Bobonaru, Tomas Maia, informa ba jornalista iha kna’ar fatin, ohin.
Maske espasu la sufisiente maibé nia relata dukumentu hirak ne’e aseguradu no la hetan estragu.
“Ami fahe servisu ba funsionáriu ida ka rua, atu toma konta ba ida-ne’e loro-loron ne’ebé asegura di’ak. Ba oin, presiza asegura ho di’ak liután tanba dokumentu sira-ne’e invoice ne’ebé komunidade selu ita presiza asegura. Tanba, servisu hotu-hotu iha ne’e bazeia ba karimbu Banku nian, entaun ne’ebá ne’e ita bele haree surat-tahan maibé ne’e osan,” nia dehan.
Nia haktuir, problema ne’e hato’o ona ba Autoridade Munisipál Bobonaru hodi propoin iha Orsamentu Jerál Estádu (OJE) tinan 2024, maibé la pasa iha Komisaun Revizaun Orsamentu (KRO).
Diretór ne’e haklaken, DNTT Munisípiu Bobonaru submete ona pedidu ba parte kompetente atu halo reablitasaun no konstrui armajen foun hodi arkiva dukumentu hirak ne’e.
“Maibé ne’e depende ba planu husi Governu sentrál,” nia hateten.
Aleinde problema konabá espasu, nia dehan, DNTT munisípiu Bobonaru enfrenta problema kona-bá laiha Karreta Operasionál atu halo atividade iha terrenu.
Tuir dadus, DNTT munisípiu Bobonaru iha funsionáriu na’in-28 ne’ebé kompostu permanente na’in-lima (5) no restu ne’e funsionáriu kazuál.
Notísia Relevante: DTT Bobonaro utiliza karreta privadu fasilita servisu Estadu nian iha terrenu
Jornalista : Sergio da Cruz
Editór : Cancio Ximenes
