DILI, 27 Maiu 2025 (TATOLI)—Prezidente Senadu Reinu Kamboja, Samdech Akka Moha Sena Padei Techo HUN SEN, iha Segunda (26/05), hato’o karta felitasaun ba Prezidente Repúblika (PR), José Ramos Horta no Primeiru-Ministru (PM), Kay Rala Xanana Gusmão, kona-ba Timor-Leste nia futuru adezaun plena ba Asosiasaun Nasaun Sudeste Aziátiku (ASEAN).
“Lori Senadu Komboja no ha’u rasik nia naran, hakarak transmite felisitasaun ba Governu, Parlamentu Nasionál no povu Timor-Leste ba futuru adezaun ASEAN hanesan membru plenu durante Simeira ASEAN ba dala-47, ne’ebé sei realiza iha Kuala Lumpur, iha Outubru 2025, hafoin admisaun hanesan membru 11 ASEAN iha Simeira 40 no 41 iha Simeira ASEAN, ne’ebé realiza iha Phnom Penh, Kamboja, iha 2022,” sita karta husi HUN SEN ba Prezidente Horta.
Prezidente Senadu Reinu Kamboja dehan, hafoin hatene anúnsiu kona-ba adezaun plena Timor-Leste nian ba ASEAN, iha Simeira ASEAN ba dala-46 iha Kuala Lumpur, Malázia, husi Primeiru-Ministru Malázia no Prezidente ASEAN, Dato Seri Anwar Ibrahim, HUN SEN sente enkorajadu atu haree serbisu dedikadu husi Governu no povu tanba konsidera Timor-Leste marese hetan rekoñesimentu ne’e durante tinan barak.
“Hakat ne’e reprezenta momentu orgullozu la’ós de’it ba Timor-Leste maibé mós husi família hotu iha ASEAN, enkuantu ami hakat hamutuk ho solidaridade atu hasoru dezafiu komplesu husi senáriu globál ne’ebé sempre iha mudansa,” HUN SEN reforsa husi karta.
Notísia relevante : Outubru, Timor-Leste sai membru ASEAN
Karta ne’e hato’o tan : “Ami rekoñese kompromisu ASEAN ho integrasaun rejionál, ne’ebé Kamboja hanesan amigu no parseiru firme, iha konfiansa katak Timor-Leste nia adezaun sei hariku komunidade rejionál no kontribui ba forma signifikativa ba vizaun hamutuk kona-ba unidade, reziliénsia, dezenvolvimentu sustentável no prospriedade.”
Prezidente Senadu Reinu Kamboja iha esperansa bele serbisu iha kooperasaun hamutuk ho Estadu no Governu Timor-Leste – la’ós iha espíritu amizade maibé mós hanesan membru plenu ASEAN – hodi avansa ho aprirasaun koletiva ba rejiaun.
Karta ba PM Xanana
Prezidente Senadu Reinu Kamboja HUN SEN iha loron hanesan hakerek mós karta felitasaun ba PM Xanana.
“Ha’u kontente hafoin rona anúnsiu husi Prezidente ASEAN Dato Seri Anwar Ibrahim durante Simeira ASEAN ba dala-46 iha Kuala Lumpur, Malázia, kona-ba futuru adezaun plena Timor-Leste nian ba ASEAN. Ne’e marka istóriku ne’ebé reprezenta momentu orgullozu ba povu timoroan no hanesan sasin ida husi solidaridade, sentralidade no kompromisu ASEAN ho integrasaun rejionál,” sita karta husi HUN SEN ba PM Xanana.
Nune’e, lori Senadu no povu Kamboja, inklui pesoál, HUN SEN hato’o felisitasaun ba Governu no povu Timor-Leste ba konkista istórika ida-ne’e.
“Hanesan hakat signifikativu ba ita-nia rejiaun,” nia katak.
Hanesan amigu durante tempu naruk ona, Kamboja fó apoiu ho forma inkondisionál ba adezaun Timor-Leste nian ba ASEAN.
“Ne’ebé laiha dúvida sei hariku ita-nia esforsu koletivu hodi promove unidade, inkluzaun no dezenvolvimentu sustentável iha rejiaun Sudeste Aziátiku hotu. Hasoru panorama globál ne’ebé komplesu, inkluzaun husi Timor-Leste bele reforsa ita-nia vizaun komún ba komunidade ida husi ASEAN ne’ebé reziliénte no koeza,” HUN SEN, afirma.
Nia mós iha esperansa bele hametin kooperasaun bilaterál entre país rua no serbisu ba promosaun objetivu komún sira iha tinan tuir mai.
TATOLI
