DILI, 27 Maiu 2025 (TATOLI)—Jogu faze primeira volta entre klube 10 iha Liga Futeból Timor-Leste (LFTL) Primeira volta termina ona, no klube kapitál Dili Karketu Dili FC ho naran istimadu ‘matak malirin’ provizóriu lidera tabela klasifikasaun ho pontu tolu (3).
Notísia Relevante: Abertura liga futeból TL: SLB Laulara-Karketu Dili sei doko Estádiu Manatutu
Pontu tolu (3) ne’ebé klube jigante kapitál Dili ne’e rekolla, bainhira manán nia adversariu AD SLB Laulara ho naran istimadu ‘makikit laulara’ iha jogu abertura ne’ebé realiza iha Estádiu Manatutu semana kotuk.
Enkuantu klube sia (9) seluk iha jogu primeira volta rekolla de’it pontu ida-ida no SLB mak seidauk iha pontu, nune’e klube Xanana Gusmão nian ne’e sei hela ho pontu zero.
Klube ne’ebé mak hetan pontu ida-ida ne’e mak hanesan AS Ponta Leste vs Coração FC iha Estâdiu Glenu semana kotuk rezultadu hela ho empata 0-0 nune’e klube rua tenke fahe de’it pontu ida ba malu.
Entretantu, DIT vs Emmanuel FC iha Estádiu Manatutu semana kotuk hela ho eskore 3-3, nune’e ekipa rua mós tenke fahe pontu ba malu.
Klube Academica vs AS Marca iha Estádiu Glenu termina ho rezultadu 0-0 nune’e klube rua mós tenke fahe de’it pontu ba malu. Enkuantu Assalam vs Porto Taibessi iha Estádiu Glenu rezultadu 1-1, no ekipa rua obrigadu tenke fahe mós pontu ba malu.
Enkuantu kona-ba jogu segunda volta sei kontinua fali iha loron 13 fulan-Juñu 2025 tanba jogadór barak sei reprezenta Timor-Leste joga kontra Maldivas iha Australia semana oin iha jogu kualifikasaun kopa Asian Football Confederation (AFC) 2027.
“Jogu segunda volta ita sei para hela tanba kalendáriu ba selesaun nian sei ba joga iha Australia, ita hein sira fila mai mak kontinua iha 13 juñu,” Prezidente LFTL Ipolito Soares hateten ba Agência TATOLI, tersa ne’e.
Nia dehan, kalendáriu Federation International Football Asosiation (FIFA) no AFC nian mós importante, no jogadór sira reprejenta nasaun, nune’e tenke ba tuir lai kompetisaun referidu.
Notísia Relevante: Karketu DILI FC sólidu no preparadu kompete iha liga époka 2025
Jornalista : Hortencio Sanchez
Editór : Cancio Ximenes
