VIKEKE, 28 Maiu 2025 (TAOLI)—Diretór Programa Dezenvolvimentu Nasionál Suku (PNDS) munisípiu Vikeke, Francisco S. Verela, informa obra konstrusaun fíziku Uma Naroman ba Povu (UNP) iha munisípiu Vikeke totál hamutuk unidade 471 ne’e maioria konklui no Governu entrega ona ba benifisiáriu sira.
Notísia Relevante: Progresu konstrusaun UNP 356 iha Viqueque atinje ona 60,16%
“Kona-ba Uma Naroman ba Povu iha munisípiu Vikeke maioria ita finaliza ona, orsamentu restu sira-ne’ebé ba konstrusaun Uma Naroman ba Povu ne’e ita uza hotu ba sosa sasán nesesidade uma laran nian naj hanesan kulxaun, kama, kadeira, meza no sasán dapur nian hodi fornese ba benifisiáriu sira,” Diretór PNDS munisípiu Vikeke ne’e hateten ba Agência Tatoli, iha nia kna’ar fatin, ohin.
Francisco hatutan, Uma Naroman ba Povu ne’ebé konstrui iha 2021 ne’e hamutuk unidade 108, UNP ba tinan 2022 tipu UNP rua mak UNP regulár hamutuk unidade 300 no UNP plus A unidade 100 ne’ebé implementa iha postu Ossú iha suku 10 no Uatulari iha suku meen (6).
Enkuantu, UNP plus B distribui zinku (kalen) kada suku ida 36 benifisiáriu ne’ebé distribui ba suku 20, kompostu husi Lakluta suku haat (4), Vikeke Vila suku 10 no Uatulari suku neen (6).
“Husi UNP ne’e ita konklui ona maibé liña eletrisidade mak seidauk instala, hanesan iha suku Maluru. Maibé, ita koordena ona ho EDTL, E.P Vikeke hodi relata ba nasionál para instala ahi eletrisidade ba UNP iha Vikeke. Enkuantu UNP ne’ebé la besik liña eletrisidade ita apoia solár panel ba benifisiáriu sira hetan netik naroman iha tempu kalan,” nia hateten.
Nia observa, UNP ne’ebé konstrui ba benifisiáriu iha munisípiu Vikeke kuaze benifisiáriu utiliza ona no hela daudaun iha UNP nia laran ho haknatek.
Tuir dadus, UNP neebe implementa’ iha munisípiu Vikeke totál hamutuk unidade 481 ne’ebé konstrui iha postu administrativu Uatukarbau, Lakluta, Vikeke Vila, Ossú no postu Uatulari iha tinan 2022 ho tipu normál unidade 356 ho kustu $6.052.000 no UNP+A implementa iha postu Ossú no Uatulari iha unidade 125 ho kustu $1.625.000.
Notísia Relevante: Responsável projetu hahú halo konstrusaun UNP lima iha suku Maluru Viqueque
Jornalista : Vitorino Lopes da Costa
Editór : Cancio Ximenes
