DILI, 29 Maiu 2025 (TATOLI)–Prezidente Repúblika, José Ramos Horta, hateten Timor-Leste nia mehi adezaun ba ASEAN hahú kedan iha fulan-Juñu 1974, maibé ohin loron realiza duni mehi ne’ebé antes ne’e jerasaun tuan sira mehi.
Notísia Relevante: TL sei hetan benefísiu barak bainhira sai ona membru plenu ASEAN
Xefe Estadu José Ramos Horta nia deklarasaun ne’e nu’udar reflesaun pesoál nune’e mós espresaun agradesimentu no enkorajamentu nian, relasiona ho susesu Timor-Leste nian iha prosesu adezaun ba ASEAN.
“Ida-ne’e hatudu katak ideia kona-ba integrasaun rejionál eziste kle’ur ona molok Timor-Leste ukun-aan ka restaura independénsia iha 20 Maiu 2002. Karta ne’ebé hakerek, husi Adam Malik, iha momentu ne’ebá dirije mai ha’u nu’udar figura xave ida iha movimentu independénsia Timór nian no futuru Prezidente Timór-Leste nian. Ida-ne’e fornese perspetiva istóriku importante kona-ba Indonézia nia postura diplomátika uitoan molok Indonézia halo invazaun ba Timór-Leste iha Dezembru 1975,” PR Horta hato’o lia hirak ne’e bainhira hala’o sorumutu ho jornalista sira iha Palásiu Prezidénsia Repúblika Nicolau Lobato, Bairru Pite, foin lalais.
Nia hanoin hikas katak Timor-Leste nia mehi atu adere ba ASEAN iha tinan 1974, bainhira nia iha idade 25 no hasoru malu ho Adam Malik, diplomata seniór no Ministru Negósiu Estranjeiru Indonézia nian iha tempu ne’ebá.
Tuir nia, hafoin nia asume kna’ar nu’udar Prezidente RDTL iha 2021, ofisialmente nia haruka karta ho intensaun atu adere ba ASEAN maibé nia admite katak iha momentu ne’ebá timoroan barak mak ladún komprende ka konkorda ho nia nomós laiha nasaun membru ASEAN barak maka aseita kedas intensaun ida-ne’e.
Iha tinan ne’ebé hanesan, Prezidente JOsé Ramos Horta fó rekoñesimentu espesiál ba Prezidente Susilo Bambang Yudhoyono “SBY” (2004-2014), ne’ebé fó apoiu ba Timor-Leste nia intensaun atu adere.
Apoiu husi Indonézia ne’e, nia dehan, nu’udár viziñu boot-liu iha papél importante ba iha prosesu adezaun ba ASEAN ne’e.
Prezidente Horta no Laureadu Prémiu Nobél ba Pàz hato’o nia apresiasaun kle’an no agradesimentu ba líder no ofisiál sira ASEAN nian, tantu atuál no no líder ofisiál sira uluk nian ne’e.
Nune’e mós, hato’o agradesementu kle’an ba líder timoroan hotu-hotu iha pasadu no prezente, inklui Primeiru-Ministru Kay Rala Xanana Gusmão ne’ebé ativu hodi dudu Timor-Leste nia adezaun ba ASEAN iha tinan rua ikus ne’e.
Notísia Relevante: HUN SEN hato’o karta felisitasaun : Timor-Leste nia futuru adezaun plena ba ASEAN
Notísia Relevante:
Jornalista : Hortencio Sanchez
Editór : Cancio Ximenes
