KOVALIMA, 29 Maiu 2025 (TATOLI) – Kandidatu alunu husi Veteranu no Martir nia oan na’in-152 mak submete ona sira-nia dokumentu atu asesu bolsa estudu husi Ministériu Asuntu Kombatente Libertasaun Nasionál (MACLN-Sigla Portugés), ba tinan letivu 2025.
Prezidente Konsellu, Kombatente Libertasaun Nasionál, Munisípiu Kovalima, Osório Soares “Mausoko” dehan, kandidatu alunu veteranu nia-nia oan ne’ebé mak submete sira-nia dokumentu atu asesu bolsa estudu, hahú nível ensinu báziku primeiru siklu to’o terseiru siklu, ensinu sekundáriu no ensinu superiór rai-laran no rai-li’ur.
“Veteranu ho martir nia oan ne’ebé mak submete sira-nia dokumentu atu asesu bolsa estudu hamutuk 152 maibé bazeia ba vaga ne’ebé fó sai kada munisípiu fó oportunidade ba ita-nia veteranu no martir nia oan na’in-100”, Osório Soares relata dadus ne’e ba jornalista sira iha Tabakolot, ohin.
Notísia relevante:Vaga bolsa estudu, Veteranu-martir nia oan submete dokumentu
Tuir dadus, kandidatu veteranu no martir nia oan ne’ebé submete sira-nia dokumentu 152. Husi númeru ne’e, kandidatu veteranu no martir nia-oan ne’ebé atu asesu bolsa estudu iha ensinu báziku primeiru siklu, na’in-lima, ensinu báziku segundu siklu no terseiru siklu na’in-18, ensinu sekundáriu 37, ensinu superiór rai-laran na’in-89 no ensinu superiór rai-li’ur na’in-tolu.
Kandidatu bolsa estudu 152 ne’ebe atu pasa iha selesaun dokumentu sei haree ba kritériu sira hanesan, haree dokumentu no valór, maibé konsellu Nasionál mak halo avaliasaun atu pasa ka la’e desizaun husi nasionál. Husi munisípiu submete de’it dokumentu.
Mausoko dehan, atribuisaun vaga bolsa estudu ne’ebé Governu liuhusi Ministériu Asuntu Kombatente Libertasaun Nasional fó sai ne’e fó oportunidade ba veteranu ho sira ne’ebé grau 8 a 14, grau 15 a 19 nia-oan sira mak bele asesu ba vaga bolsa estudu.
Tuir vaga bolsa estudu ne’ebé fó sai, Governu fó oportunidade kada munisípiu hamutuk 100 kompostu husi bolsa estudu primeiru siklu ensinu báziku ema na’in-lima, bolsa estudu segundu no terseiru siklu ensinu báziku 15, bolsa estudu ensinu sekundáriu 25, bolsa estudu ensinu superiór rai-laran 50 no ensinu superiór rai-li’ur na’in-lima
Notísia relevante:Governu loke vaga bolsa estudu 100 iha Kovalima
Jornalista:Celestina Teles
Editór: Rafael Ximenes de A. Belo
