Autoridade Karaubalu ho inisiativa muda negosiante 40 bá merkadu tuan
VIKEKE, 30 Maiu 2025 (TATOLI)—Autoridade suku Karaubalu, postu Vikeke Vila, munisípiu Vikeke, sesta ne’e, ho inisiativa muda ona negosiante 40 ne’ebé faan sasán produtu lokál iha trotoar leten bá faan fali iha merkadu tuan iha postu Vikeke Vila.
Notísia Relevante: Abitante Vikeke husu autoridade organiza negosiente labele faan iha espasu públiku
“Ami mak ho inisiativa rasik hodi muda provizóriu ita-nia negosiante sira bá iha merkadu tuan, Depois, merkadu Olobai agora halo ona prosesu reabilitasan remata mak muda ba merkadu Olobai. Muda negosiante sira-ne’e ami mós husu apoia ba autoridade munisípiu, maibé sira okupadu ho servisu. Ne’ebé, ohin, ami autoridade suku de’it mak tun hodi muda ita-nia negosiante sira faan modo iha trotoar letan sira-ne’e ba ona merkadu tuan nia laran,” Xefe suku Karaubalu, João Pinto, hateten ba Agência TATOLI, iha postu Vikeke Vila, ohin.
Durante ne’e, nai dehan, negosiante sira okupa tiha espasu públiku entaun ema la’o-ain mós la’o ladi’ak no sai risku ba dezatre no engrafamentu, tanba ne’e organiza negosiante sira bá faan fali iha merkadu tuhan nia laran atu fó espasu ba ema la’o-ain hodi la’o ba-mai.
“Durante ne’e ita haree espasu ba ema la’o laiha tiha, sai risku ba ema la’o ain, inklui mós sira faan sasán sira, tan ne’e ita muda negosiante sira. Loloos ne’e, Diresaun Merkadu munisípiu mak organiza maibé sira halo sira-nia dever, entaun ami konvoka konsellu suku, Konsellu Poliasiamentu Komunitária, Ofisiál Polísia Suku sira tuur hamutuk hodi deside muda negosiante sira. Nune’e, labele fó risku ba ita-nia komunidade tantu negosiante no komunidade ne’ebé la’o-ain ba-mai,” nia hateten.
Molok muda negosiante sira-ne’e, autoridade suku Karaubalu hamutuk ho konsellu suku sosa tinta hodi kria kondisaun fatin fatin ba negosiante sira hodi tau kedas markasaun fatin ba kada negosiante sira, atu labele hadau malu fatin.
“Fatin ba negosiante sira-nian, ami sukat no pinta kedas, ne’ebé negosiante ida-idak faan hotu iha merkadu laran. Aleinde indika fatin ba negosinte sira, ami mós halo limpeza iha fatin sira merkadu laran atu negosiante sira uza hodi faan sira-nia sasán. Ba oin, ita sei bandu ema sei la faan iha trotoar leten no ita sei kontrola sira kada loron, atu nune’e la bele faan tan fali iha espasu públiku,” nia dehan.
Negosiante ne’ebé faan produtu lokál iha espasu públiku ne’e hamutuk na’in-40 ne’ebé autoridade lokál suku Karaubalu hamutuk konsellu suku sira muda ona merkadu tuan, atu hein prosesu reabilitasaun merkadu Olobai ramata mak hafoin muda fali ba merkadu ne’e.
Reprezenta negosiante sira, Felisidade de Sousa Freitas, haktuir negosiante sira pronto kumpre desizaun husi suku hodi faan iha merkadu laran atu husik fatin espasu públiku bele livre.
“Ami prontu koopera ho autoridade sira ba faan iha merkadu tuan laran. Ami faan produtu la’ós permanente maibé dadeersan faan hotu depois lorokraik fila-fali ba uma,” nia dehan.
Entretantu, muda negosiante sira-ne’e hetan akompañamentu husi autoridade lokál suku Karaubalu, KPK, OPS mak hodi muda negosiante sira ba merkadu tuan.
Notísia Relevante: PAM Viqueque ho SEATOU estabelese ekipa muda vendedór bá merkadu Olobai
Jornalista : Vitorino Lopes da Costa
Editór : Cancio Ximenes
