DILI, 30 Maiu 2025 (TATOLI)-Fundu Dezenvolvimentu Kapitál Umanu (FDCH-sigla portugés), prepara tán bolseiru na’in-15 ba bolsa estudu méritu tinan 2025 nian ne’ebé sei bá estudu iha Portugál no Brazil.
“Ida-ne’e ita prepara dosente universidade privadu sira hodi hasa’e sira-nia nível mestradu no dotoramentu. Mestradu na’in-13 no dotoramentu na’in-rua”, Diretór Ezekutivu FDCH, Júlio Aparício, informa ba TATOLI iha nia knaar fatin Kolmera, sesta-ne’e.
Nia dehan bolseiru sira ne’ebé sei bá Portugál iha fulan-Setembru no Brazil bá Novembru.
Bolseiru sira ne’e hosi Institutu Siénsia Saúde (ICS, sigla portugés), Institutu Kristál, Universidade Katólika Timorense (UCT sigla portugés), Universidade Dili (UNDIL), no seluk tan. Sira-ne’e, balun estuda área enfermajen, matemátika no língua.
Aparício hatutan bolseiru ne’ebé atu estudu iha ne’ebá ne’e tenke prenxe kritériu ida mak língua portugés. Tenke hatene tanba matéria hotu-hotu ho língua portugés. Maibé sira-ne’e prenxe kritériu no hein desloka.
“Tanba ita-nia língua ofisiál ne’e portugés entaun atu hadi’a ita-nia língua portugés iha Timor-Leste, presiza ita-nia profesór sira ba oin no estudante sira ba oin ami tenke haruka ba Portugál no Brazil, tanba ne’e ami fó sai kritériu ida katak ema ne’ebé atu konkore ba vaga ida-ne’e tenke tuir kursu programa formasaun ne’ebé mai husi ensinu superiór”, nia afirma.
Diretór Ezekutivu ne’e salienta tán, dosente ne’ebé haruka bá estudu iha Portugál no Brazil ne’e fila mai kontinua dezenvolve siénsia ne’ebé sira iha ba univerdade ne’ebé antes ne’e ensinu ba.
Nia akresenta prosesu sira ne’e servisu hamutuk ho ekipa juri ba prosesu avaliasaun nian no ho ensinu superior, liu-liu Unidade Parseria Kooperasaun husi ensinu superiór Portugal no Brazil.
Diretór Ezekutivu FDCH, esplika sei haruka osan ba ensinu superiór ne’ebé sira ensinu ba depois mak sei halo pagamentu direta ba bolseru sira.
“Maibé kuandu sira fila sira tenke hetan kontratu hosi Reitór eskola, ne’ebé sei asina hosi FDCH inklui dosente ne’e rasik. Atu nune’e sira fila mai hanorin permanente iha sira-nia universidade. Labele hodi tiha universidade ne’e nia naran ba estuda, fila mai ba fali fatin seluk”, realsa.
Mestradu tinan tolu, ba doutoramentu tinan haat. Bolseiru bá estudu Portugál kada fulan ema ida hetan $1.000 no ba Brazil nian kada fulan ema ida hetan $750.
Notísia relevante: FDCH loke vaga ba bolsa méritu hamutuk 121
Jornalista : Osória Marques
Editora : Rita Almeida
