DILI, 30 Maiu 2025 (TATOLI)—Ministériu Komérsiu no Asuntu Ekonómiku (MCAE-sigla portugeza) iha kooperasaun ho liña ministériu sira selebra Loron Mundiál Oseanu no Ambiente ho tema: “Ha’u-nia tasi no ha’u-nia Timor” ne’ebé selebra tinan-tinan iha loron 1-8 Juñu tinan ne’e.
Diretora Nasionál Atividade no Produtu Turizmu MCAE, Maria Ernestina Lopes, esplika katak Governu sei promove atividade te’in, karavana, kuda ai-parapa no hamoos ambiente tasi nian.
“Atividade sira husi selebrasaun ne’e ho objetivu atu sensibiliza populasaun no estudante sira. Selebrasaun ne’e sei partisipa hosi grupu sosiedade sivíl hamutuk 30 no estudante sekundáriu sira,” Maria Ernestina dehan durante konferénsia imprensa iha Vila Verde, Dili, sesta ne’e.
Iha fatin hanesan, Diretora Jerál Gabinete Fronteira Terrestre no Marítima, Helena de Araújo, hateten, ekonomia azúl nu’udár programa prioridade Governu, tanba ne’e Governu hakarak selebra loron mundiál ne’e no MCAE hakarak sensibiliza kona-ba polítika ne’e iha nasaun tomak.
“Gabinete Fronteira Marítima no Ekonomia Azúl, hamutuk ho ministériu sira iha kompromisu. Tanba ne’e, iha tinan ida-ne’e, ita sei selebra loron mundiál sira iha munisípiu hotu-hotu, hahú iha loron 1-8 Juñu. Ami hakarak selebra loron hirak-ne’e hodi informa ba populasaun sira kona-ba kuidadu ambiente,” Helena informa.
Nia haktuir, abertura selebrasaun ne’e sei hahú iha Tasi Tolu no kontinua iha Ataúru no munisípiu hotu-hotu. Sei iha mós atividade karavana ne’ebé sei hahú iha loron 7 Juñu iha Praia dos Coqueiros no sei la’o ain to’o iha Portu Dili.
Entretantu, Governu aloka orsamentu rihun $65-resin ba atividade referida.
Jornalista: Felicidade Ximenes
Editór: Xisto Freitas da Piedade
