VIKEKE, 30 Maiu 2025 (TATOLI)—Loron Nasionál Funsaun Públika ba da-XI sei selebra iha munisípiu Vikeke.
Notísia Relevante: Governu halo alterasaun daruak ba Estatutu Funsaun Públika
Komisáriu Komisaun Funsaun Públika (KFP), José Telo Soares Cristovão, haktuir tinan-tinan realizasaun loron nasionál Funsaun Públika ne’ebé monu iha 15 jullu, ne’e komemora funsionáriu públiku sira ninia loron ne’ebé durante ne’e hala’o ninia kna’ar hanesan mákina Estadu.
“Realizasaun ne’e hanesan valorizasaun ida ba funsionáriu tomak no buka introdús ba públiku hodi hatene servisu Funsaun Públika nian. Tinan sanulu liubá, ita selebra iha nasionál de’it, maibé iha tinan kotuk MACLN hanesan uma-na’in ba realiza LNFP iha Ainaro no ba tinan 2025 selebra iha Vikeke. Enseramentu komemorasaun ne’e sei marka mós prezensa husi Primeiru-Ministru (PM) no membru Governu sira. Membru Governu sira mai hodi haree mós realidade Viqueque hodi bele hadi’a buat ruma iha futuru. Tanba, KFP mai hamutuk ho Komisaun Organizadora atu orienta ba realizasaun atividade sira la’o di’ak iha Vikeke,” José Telo Soares Cristovão hateten iha salaun administrasaun Vikeke, ohin.
Komisaun Funsaun Públika hamutuk ho Ministériu Finansa hanesan Komisaun Organizadora ba Komemorasaun Loron Nasionál Funsaun Públika ba da_XI ba tinan 2025 ne’e kolabora hamutuk ho Ministériu Edukasaun, Ministériu Saúde, MACLN no Centro Nacional Chega (CNC) realiza enkontru dahuluk ho Prezidente Autoridade Munisípiu Vikeke hodi introdús programa no atividade sira-ne’ebé mak sei hili Munisípiu Vikeke hanesan fatin prinsipal ba realizasaun atividade LNFP-X.
Nune’e, ekipa tékniku aprezenta programa ba entidade sira-ne’ebé marka prezensa fó mós sujestaun no programa sira-ne’ebé identiku ho munisípiu Vikeke nian hodi introdús no demonstra iha loron imporntate ne’e.
Hafoin enkontru, entrega mós kamizola ida hanesan simbolu ba mini Komisaun Organizadora ba realizasaun Loron Nasionál Funsaun Públika ba da-XI iha Vikeke.
Iha fatin hanesan, Prezidente Autoridade Munisípiu Vikeke, Francisco C.S de Gonzaga Soares, huato’o agradesementu ba parte Komisaun Funsaun Públika (CFP, sigla portugés) ho Ministériu Finansa (MF) sai hanesan komisaun organizadora ne’ebé hili ona Vikeke sai hanesan uma-na’in ba serimónia komemorasaun aniversáriu funsaun públika nian ba da-XI iha salaun Laline Asministrasaun Munisipál Vikeke.
“Ha’u lori autoridade tomak no munisípiu Vikeke hotu hakarak hato’o agradese ba Komisaun Funsaun Públika no Ministériu Finansas ne’ebé hili ona Viqueque sai hanesan uma-na’in ba komemorasaun aniversáriu Komisaun Funsaun Públika nian. Vikeke prontu atu ezekuta konfiansa ne’ebé nasionál fó mai ami,” nia dehan.
Entretantu, enkontru koordenasaun ba preparasaun komemorasaun aniversáriu Funsaun Públika ba da-XI ne’e partisipa husi Prezidente komisaun organizadora ho ekipa nasionál, lidera husi Prezidente INETL ho Komiáariu Protofoliu Planeamentu Forsa Traballu KFP ho autoridade munisipál sira.
Notísia Relevante: PR Horta husu halo reforma radikál ba funsaun públika
Jornalista : Vitorino Lopes da Costa
Editór : Cancio Ximenes
