DILI, 30 Maiu 2025 (TATOLI)–Sekretariadu Tékniku Administrasaun Eleitorál (STAE) to’o fulan-Maiu ne’e ezekuta ona pursentu 41 hosi Oresamentu Jerál Estadu (OJE) 2025.
“Ezekusaun OJE 2025 ba STAE ita ezekuta ona 41%. Ida-ne’e to’o iha fulan-Maiu ne’e”, Diretór Jerál STAE, Elviro Fernandes, dehan ba TATOLI iha nia knaar fatin Kaikoli, ohin.
Diretór Jerál STAE dehan hosi pursentu 41 ekivale ba osan hamutuk $806.365,86.
“Ita-nia osamentu ba STAE nian tinan 2025 hamutuk miliaun $1.9. Atuál mak ida ita hasai ona ne’e, inklui saláriu no vensimentu, viajen lokál, osan sai ona ne’e hamutuk $431.806,15. Ba obligasaun mak iha $61.370,64. Ida-ne’e klaru ona, ita tenke fó osan ne’e, no komitmentu iha $302.320,60. Ne’e katak ema asina ona kontratu ona no prosesu iha ona, ita hein para selu”, nia esplika.
Item sira mak hanesan finansiál manajementu, administrasaun no lojistiku, patrimóniu públiku, matéria eskritóriu, kombustivel, seguransa no limpeja, manutensaun, komunikasaun, catering.
Notísia relevante: STAE Bobonaru sei prodús kartaun biométriku ba eleitór sira iha Juñu
Jornalista : Osória Marques
Editora : Rita Almeida
