KOVALIMA, 02 Juñu 2025(TATOLI ) – Ministru Planu no Investimentu Estratéjiku (MPIE) Francisco Gastão Sousa akompaña hosi Sekretáriu Estadu Dezenvolvimentu Lokál Mateus dos Santos Tallo, Diretór Jerál Planu Ordenamentu territóriu ho autoridade Kovalima, segunda-ne’e hala’o abertura ofisiál Planu Munisipál Ordenamentu Territóriu (PMOT) iha munisípiu Kovalima.
Autoridade governamentál sira ne’e, lia-na’in husi suku Kamnasa, simu no halo abertura ofisiál ba PMOP ho lia-dadolin tuir kultura suku Kamnasa, Postu administrativu Suai, Munisípiu Kovalima.
“Ita hamutuk oinsá bele dezenvolve Planu munisipál ordenamentu territóriu munisípiu nian, ho nune’e líder partidu polítiku mai ita hamutuk oinsá atu bele partisipa iha elaborasaun PMOP importante ba munisípiu”, Ministru Francisco Gastão Sousa hato’o iha nia diskursu molok abertura ofisiál PMOP, iha Salaun AMC, ohin.
Governante ne’e dehan, PMOT munisípiu Kovalima importante oinsá munisípiu bele uza tuir nesesidade ba Kovalima-oan nia moris di’ak. Ho nune’e bainhira ba interrese munisipál, líder sira presiza konvida ema hotu atu partisipa iha elaborasaun PMOT ne’e.
Atu elobora PMOP sei hala’o audénsia públika, konsultór sei halo aprezentasaun hamutuk ho diresaun Jerál ordenamentu territóriu husi nasionál maske daudaun ne’e la fó importánsia ba PMOT, maibé bainhira hala’o audénsia públika foin bele sente importánsia husi PMOT ne’e.
“Atu halo sidade oinsá ida-ne’e depende ba ita-boot sira Kovalima munisípiu ne’ebé riku tanba ne’e konstrusaun auto-estrada ba dahuluk iha Kovalima. Foin lalais ne’e ita lansa tan projetu Suai Suplay Base”, nia fo hanoin.
Prosesu ordenamentu territóriu sei identifika rai sira ne’ebé potensiál ba agrikultura ka ba investimentu sa ida de’it,nune’e investidór sira mai nune’e autoridade sira indika rai sira ne’ebé mak presiza halo investimentu, agrikultura no rai ne’ebé mak atu dezenvolve parte indústria maibé presiza hamutuk atu hala’o investimentu ho oinsá.
Prezidente Autoridade Munisípiu Kovalima, Miguel Armada Cardoso dehan, atividade ida-ne’e importante ba dezenvolvimentu – futuru, ba munisípiu Kovalima, tanba jeografikamente Kovalima fronteira ho Indónezia.
“Kovalima iha mós rekursu naturál importante hanesan potensiál ba dezenvolvimentu atividade agrikultura, pekuária, peska no floresta maske poténsial hirak ne’e iha investimentu Governu haree ba infraestrutura ami sei hasoru difikuldade barak liga ba asesu ba servisu públiku ho kualidade”, nia informa.
Autoridade Kovalima ne’e akresenta, munisípiu presiza apoia atu orienta dezenvolvimentu atubele esplora área potensiál sira nune’e bele rezolve problema sira.
Ho planu ordenamentu territóriu sei dezenvolve munisípiu sai hanesan instrumentu ne’ebé mak presiza hodi hala’o dezenvolvimentu ho loloos tanba munisípiu hein kle’ur ona atu dezenvolve PMOP.
Notísia relevante: https://tatoli.tl/2025/03/12/planu-munisipal-ordenamentu-territoriu-ba-munisipiu-tolu-aprovadu/
Jornalista: Celestina Teles
Editór : Rafael Ximenes de A. Belo
