DILI, 02 Juñu 2025 (TATOLI) – Deputadu husi bankada CNRT, Domingos Augosto ‘Deker’, apresia serbisu Governu nian, ne’ebé kontinua fó priopridade ba adezaun plena Timor-Leste ba membru Asosiasaun Nasaun Sudeste Asiátiku (ASEAN, sigla inglés).
Deputadu ne’e parabeniza Xefe Governu, Xanana Gusmão, ho esforsu hotu ne’ebé halo hodi konsege konvense nasaun ASEAN simu Timor-Leste nu’udar membru ba da-11 ne’ebé sei formaliza iha próximu fulan-Outubru.
“Merese ita-nia orgulu mai ita hotu, tan ne’e parabéns dala ida tan ba IX Governu Konstitusionál, nasaun membru ASEAN no ba povu Timor-Leste”, nia hato’o iha reuniaun plenária Parlamentu Nasionál, ohin.
Iha fatin hanesan, deputada husi bankada PD, Mariano Fernando Malik, kongratula ba esforsu tomak ne’ebé primeiru-ministru halo no lori Timor-Leste ba hola parte iha organizasaun rejionál ninian.
Deputada FRETILIN, Cirstina Yuri Ribeiro, dehan Timor-Leste sei sai membru plenu ASEAN nu’udar atinje boot ida no hanesan testemuñu kona-ba esforsu durante tinan barak hahú kedas husi primeiru to’o nonu Governu ho lideransa sira hotu ho rezisténsia no determinasaun povu Timor-Leste atu hetan fatin iha rejiaun ne’e rasik.
Tuir Nia, adezaun ba ASEAN mak sinál klaru katak, Timor-Leste prontu atu fó kontribuisaun importante ba pás, estabilidade no dezenvolvimentu koletivu iha rejiaun ida-ne’e.
Nia hateten ASEAN la’ós de’it plataforma diplomátiku, maibé nia mak oportunidade atu loke dalan ba ekonomia ne’ebé forte, troka koñesimentu no edukasaun no diálogu polítiku ida ne’ebé benefisia jerasaun foun no povu tomak.
“Ho nune’e ami husu ba Governu kontinua hala’o diálogu abertu no inkluzivu ho setór tomak, inklui Parlamentu, sosiedade sívil, setór privadu no komunidade atu asegura ita-nia jornada ba ASEAN sei hametin demokrásia, proteje interese nasionál no fóprioridade ba povu nia moris tomak”, deputada husi bankada opozisaun ne’e hato’o.
Lembra katak Timor-Leste nia mehi atu adere ba ASEAN hahú kedan iha fulan-Juñu 1974 no ohin loron realiza duni mehi ne’ebé antes ne’e jerasaun tuan sira iha.
Iha anúnsiu importante ida iha Simeira ASEAN ba da-46 ne’ebé hala’o iha Kuala Lumpur, Primeiru-Ministru Malázia nian, Dato’ Seri Anwar Ibrahim, deklara ofisialmente katak Timor-Leste sei hetan adezaun tomak iha Simeira ASEAN ba da-47 ne’ebé sei realiza iha fulan-Outubru tinan ne’e, iha Kuala Lumpur.
“Ida-ne’e marka momentu istóriku ida la’ós de’it ba Timor-Leste, maibé ba família ASEAN tomak. Viajen Timor-Leste nian ba adezaun tomak reflete ita-nia vizaun koletiva ba ASEAN ida-ne’ebé unidu, koezivu, no haree ba oin”, nia hato’o foin lalais ne’e.
Notísia relevante: Timor-Leste selebra desizaun istóriku adere ba ASEAN
Jornalista: Nelson de Sousa
Editora: Maria Auxiliadora
