VIKEKE, 09 Juñu 2025 (TATOLI)—Servisu Ministériu Obra Públika (SMOP) munisípiu Vikeke propoin ona kondisaun estrada husi diresaun Uatukarbau liga Uatulari no liga munisípiu Vikeke ba nasionál atu hadi’a, tanba sempre difikulta komunidade lori sira-nia produtu lokál bá asesu merkadu.
Notísia Relevante: Projetu reabilitasaun estrada rurál iha Viqueque hamutuk pakote sia
Diretór SMOP munisípiu Vikeke, Casildo Soares Gomes, hateten kondisaun estrada husi diresaun postu Uatukarbau to’o postu Uatulari no husi suku Uma Uain Leten to’o munisípiu Vikeke durante ne’e sai preokupasaun ba komunidade no autoridade munisípiu Vikeke tanba difikulta tebes ba movimentasaun ba-mai.
“Ho ida-ne’e mak ita hato’o ona proposta estrada husi Uatukarbau, Uatulari to’o munisípiu Vikeke nian ba iha Minitériu Obra Públika (MOP), hodi foti desizasaun ba estrada sira-ne’ebé kondisaun aat sira-ne’e, ida ne’ebé mak tau prioridade atu hadi’a uluk,” Casildo Soares Gomes hateten ba Agência Tatoli iha nia kna’ar fatin, Beloi, ohin.
Ministériu Obra Públika mós tau atensaun ba estrada nasionál, munisipál no estrada urbana sira iha tinan 2025-2026, nune’e ministériu sei haree koneksaun estrada sira-ne’ebé ba postu no ba munisípiu seluk atu povu asesu.
“Ita hotu hein de’it. Tanba ne’e, desizasaun husi Ministériu mak bele deside. Tanba, estrada sai preokupasaun ba populasaun sira kona-ba estrada, ne’ebé ita hato’o hotu ona. Ita mós konsidera katak estrada sai importante ba ita hotu iha munisípiu Vikeke, nune’e ami-nia esperansa ba ministériu hodi rezolve preokupasaun komunidade nian liga ba estrada ne’e,” nia hateten.
Tuir dadus, estrada nasionál husi postu Uatukarbau to’o mota Bebui no Uatulari hamutuk kilómetru 14,74, no Beboi to’o suku Uaitame kilómetru ida (1).
Enkuantu, estrada nasionál husi suku Uma Uain Leten, postu Vikeke Vila to’o Naheboruk hamutuk kilómetru 26, no husi estrada sira-ne’e kondisaun grave entaun iha tempu udan ne’e difikulta movimentasaun ema la’o ba-mai.
Iha fatin seluk, administradór postu Uatulari, Jorge Ribeiro, hateten kondisaun estrada husi diresaun Uatulari bá munisípiu Vikeke kondisaun grave tebe-tebes hodi difikulta transporte públiku movineta ba-mai.
“Ita-nia kondisaun estrada ne’ebé husi Uatulari liga munisípiu Vikeke agora daudaun kondisaun aat. Nune’e halo ami-nia karreta aat beibeik, ne’ebé sai difikuldade ba ami-nia viajen ba munisípiu Vikeke,” nia dehan.
Jornalista : Vitorino Lopes da Costa
Editór : Cancio Ximenes
