BOBONARU, 11 Juñu 2025 (TATOLI)—Komisaun Antí Korrupsaun (CAC, sigla portugés) hala’o sensibilizasaun lei ñumeru 7/2020 kona-ba Medida Prevensaun no Kombate Korupsaun (MPCC, sigla portugés) ba ajente setór públiku no privadu sira iha Bobonaru ho tema “Hasa’e Koñesementu Ajénte Públiku no Setór Privadu tuir lei MPCC”.
Notísia Relevante: Ezekuta orsamentu Estadu la tuir regra, CAC buska PAM Aileu
Komisáriu adjuntu ba prevensaun iha CAC, Rosario Salsinha Araújo, konfirma sensibilizasaun lei MPCC ne’e hanesan atividade regulár, atu fó hanoin no hafanu ajente setór públiku no privadu sira oinsá atu bele jere rekursu Estadu ho didi’ak no loloos tuir lei.
“Setór rua ne’e mak besik liu rekursu Estadu nian. Ita hatene setór rua ne’e importante iha nasaun tanba ida mak la la’o ne’e, ida seluk mós labele book-aan. Entaun, ita sensibiliza ba sira para jere rekursu Estadu ne’e tuir lei, labele sees husi ne’e. CAC hakarak hadi’a sistema ba oin oinsá mak harii nasaun ida-ne’ebé mak ema hotu-hotu bele sente dehan nasaun ema hotu-hotu nian. Rekursu hotu ne’ebé Estadu fó ne’e povu bele sente husi buat oioin. Ezemplu mak sente uma di’ak, estrada di’ak, eletrisidade, bee ne’ebé ema hotu bele asesu,” nia imforma ba jornalista sira, iha Salaun Maria-Tapo
Nia dehan, CAC nia halo sensibilizasaun ne’e ho kompromisu no espetativa ida atu líder sira iha setór públiku bele servisu no tau liman hamutuk ho setór públiku hodi promove governasaun di’ak no lori dezenvolvimentu ba povu iha futuru.
“Ladauk iha indisiu ruma hatudu katak Bobonaru envolve iha buat barak iha ne’e. Maibé komu ida-ne’e iha hela nivel sensiblizasaun, atu fahe informasaun ba ema hotu-hotu evita atu labele monu ba aktu sira-ne’e. Kuandu ba aktu kondenatóriu, sira mai ho lei entaun forsa lei ne’e mai, investigadór sira-nia servisu atu haree aktu irregularidade ne’e mosu ona,” nia hateten.
Sekretáriu Autoridade Munisípiu Bobonaru ba asuntu Sosiál no Organizasaun Komunitária, Julio Carvalho Caeiro, hato’o agradesementu ba CAC no konsidera atividade ne’e importante tebes no interresadu tebes ba kargu xefia no funsionariu públiku sira inklui emprezáriu sira.
“Liu husi programa ne’e sira bele hatene informasaun para labele envolve iha korrupsaun nia laran, tanba ne’e risku ba ita-nia aan,” nia dehan.
Tuir observasaun husi Agência tatoli hatudu katak, atividade ne’e hetan partisipasaun másimu hodi autoridade munisípiu liuliu kargu xefia sira iha setór públiku, funsionáriu no emprezáriu sira iha munisípiu Bobonaru.
Notísia Relevante: CAC halo introdusaun lei MPCC ba kargu xefia-setór privadu sira iha Oekusi
Jornalista : Sergio da Cruz
Editór : Cancio Ximenes
