DILI, 12 Juñu 2025 (TATOLI)—Centro Nacional Chega! Institutu Públiku (CNC, I.P), asina akordu ho Asosiasaun Vítima Konflitu Polítiku 1974-1999 hodi apoiu fundu $107.101,10 ba implementasaun uma memória esperansa neen ba vítima sira iha munisípiu haat hanesan, Baukau rua, Manatutu ida, Manufahi rua, no Ainaru ida.
Diretór Ezekutivu CNC, I, P, Hugo Maria Fernandes, hateten, objetivu husi akordu ne’e mak atu fó apoiu finanseiru ba asosiasaun hodi implementa programa uma memória esperansa ba sobrevivente sira ne’ebé vulnerável tebes.
“Atividade ne’e hanesan akordu regulár ba tinan 2025, ne’ebé CNC halo ho Asosiasaun Vítima iha ámbitu harii uma memória ba vítima sira husi funu ho kapasidade rua, hanesan apoiu dezenvolvimentu institusionál nomós ba implementasaun programa harii uma sira,” Diretór informa iha sala enkontru CNC, I.P, Balide, Kinta ne’e.
Notísia relevante : CNC sei oferese uma memória esperansa ba sobrevivente na’in-neen
Uma memória nu’udar parte ida husi implementasaun mandatu CNC nian, tuir Dekretu-Lei nú. 48/2016 katak atu tau-matan no apoiu ba sobrevivente sira husi violasaun direitu umanu ne’ebé akontese durante períodu 1974-1999.
“Sobrevivente sira ne’ebé hetan oportunidade ba implementasaun programa ne’e kompostu husi feto haat, mane rua, enkuantu vítima feto sira-ne’e kauze husi violasaun seksuál, vítima mane sira tanba kondisaun saúde no ekonomia ne’ebé vulnerável tebes,” nia akresenta.
Iha fatin hanesan, Koordenadór Sekretariadu Nasionál Asosiasaun Vítima Konflitu Polítika, Domingos Pinto de Araújo Moniz, hateten, durante ne’e CNC, I.P fó apoiu no tinan ida-ne’e sei prioriza liu ba munisípiu haat tanba durante ne’e sira seidauk sai benefisiáriu ba programa.
“Iha munisípiu Baukau ita sei implementa iha Baukau Vila, Manatutu sei implementa iha Laleia, Manufahi sei implementa iha Fatuberliu no Alas, enkuantu Ainaru sei harii iha Hatu-Udu. Uma sira-ne’e sei ho medida ne’ebé hanesan”, Koordenadór ne’e katak.
Nia esplika, Asosiasaun Vítima sei serbisu hamutuk ho autoridade no komunidade lokál bainhira implementa ona peograma. Prosesu konstrusaun baibain presiza durante fulan-neen, maibé bainhira akontese iha difikuldade ruma kona-ba distánsia. entaun suspende ba fulan-rua tan.
Hahú tinan 2021 to’o 2024, CNC, I.P harii ona uma memória 20, ne’ebé kada uma ho kustu $14.000 ba sobrevivente sira ho kondisaun vulnerável.
Jornalista : Alexandra da Costa
Editora : Julia Chatarina
