BOBONARU, 12 juñu 2025 (TATOLI)–Diresaun Servisu Munisipál Jestaun Merkadu (DSMJM) munisípiu Bobonaru oferese materiál hodi harii hikas barraka fa’an ikan iha área Obor, suku Raifun, postu administrativu Maliana atu fasilita negosiante sira halo aktividade.
DSMJM oferese materiál sira mak hanesan sementi, rai-henek no batako hodi harii fatin foun tanba durante ne’e negosiante sira fa’an ikan iha estrada públika iha parte Rotunda Maliana.
Molok ne’e, ekipa Sekretaria Estadu Asuntu Toponimía no Organizasaun Urbana (SEATOU) hamutuk ho Autoridade munisípiu Bobonaru sobu negosiante sira-nia barraka tanba konsidera la ijene no bele fó impaktu ba saúde públika.
“Lorokraik – Lorokraik sira duni malu ho jestór merkadu na’in-haat iha Rotunda, iha ne’ebá sira fa’an ikan konserteza ninia aroma ladi’ak ba ema tanba vila laran. Entaun, ami buka meiu atu apoia materiál ba sira tanba momentu sobu ne’e ami promete ba sira atu kria kondisaun, ne’e mak agora sira harii filafali fatin uza sapiten para ikan nia bee foer bele soe iha ne’ebá,” Diretór Servisu Munisipál Jestaun Merkadu munisípiu Bobonaru, Paulo Dos Santos, informa iha salaun Maria-Tapo, Kuarta (12/06).
Notísia Relevante : Autoridade Bobonaro sei kria kondisaun ba negosiante sira fa’an ikan iha Obor
Antigu Administradór postu administrativu Balibo ne’e dehan, barraka fa’an ikan sei harii provizóriu de’it tanba tuir planu sei muda bá merkadu Mau-Mali.
“Antes ne’e ami promete ba sira, entaun hanesan responsabilidade boot tanba sira ne’e la’ós ema seluk, mesak ita-nia komunidade ne’ebé hakarak buka moris, sira buka moris ne’e ho buat ida fa’an ikan atubele sustenta sira-nia fámilia. Entaun, ami fó apoia harii fatin provizóriu, la’ós permanente, aban bain-rua muda bá kraik sira bele fa’an iha fatin ne’ebá, depois fatin sira uza ne’e tau fali ba planu seluk,” nia akresenta.
Notísia Relevante : Negosiante sira husu autoridade Bobonaru rezolve kondisaun merkadu liuhusi PDIM
Sorin seluk, Abitante Maliana, Florindo Pereira, konkorda ho desizaun Autoridade Bobonaru tanba konsidera fa’an ikan iha espasu públiku hatudu imajen ladi’ak.
“Maliana ne’e kapitál munisípiu, fa’an ikan fali iha dalan ninin halo ita-nia sidade sai sabraut, se agora Autoridade munisipál halo ona uma-oan ba sira ne’e di’ak ona, sira fa’an konsentra hotu iha ne’ebá, fatin hadi’a halo moos ita haree hanesan buat sira ne’e organizadu,” nia katak.
Jornalista : Sergio da Crúz
Editora : Julia Chatarina
