BOBONARU, 12 juñu 2025 (TATOLI)–Estudante na’in-16 husi Eskola Esinu Báziku Filiál (EBF) Budin, suku Batugade, postu administrativu Balibo, munisípiu Bobonaru, Kuarta (11/06), evakua ona bá Postu Saúde Batugade hodi hetan asisténsia médika tanba la konfortável hafoin konsumu ai-han Merenda Eskolár.
Koordenadór EBF Budin, António dos Santos Gama, konfirma, menu ne’ebé fornese momentu ne’ebá mak ikan tongkol, ne’ebé hafoin estudante sira han hatudu kedan sintoma hanesan oin mean, ulun moras, lanu no balun muta to’o deamaia.
“Menu loron-loron ha’u haree di’ak, ohin loron mak fornesedór sira sosa ikan tongkol, ikan ohin sira sosa ne’e ha’u mós la haree, ha’u mai ne’e sira ko’a tia ona maibé tuir menu ne’ebé iha ikan tongkol la uza, so iha mak ikan iha Kolam. Ha’u hateten beibeik sira mais dehan atu oinsá ami lori mai ona,” Koordenadór informa ba jornalista sira iha resintu eskola.
Notísia Relevante : Estudante rihun 29,078 iha Bobonaru sai benifisiáriu ba PME 2025
Iha sorin seluk, Responsável Vijilánsia Epidiomolojia Servisu Saúde Munisípiu Bobonaru, Zito Viegas da Cruz, informa, estudante sira hetan ona atendimentu saúde no daudaun iha ona faze rekuperasaun.
Ekipa Servisu Saúde Munisipál liuhusi programa no Vijilánsia Epidiomolojia no Ambientál foti ona amostra husi ai-han ne’ebé estudante sira konsumu hodi halo teste no analiza iha Laboratórium Nasionál.
“Ita haruka sampel ne’e atubele identifika substánsia tóksiku sira ne’ebé deskonfia kontein iha alimentasaun, ita hein rezultadu husi laboratóriu depois ida mak ita bele foti diagnóstiku klaru katak alimentu ida-ne’e mak kauza ba Intoksikasaun referidu,” nia tenik.
Notísia Relevante : DSME Bobonaru forma rede monitorizasaun tau matan ba PME
Diretór Servisu Munisipál Edukasaun, Autoridade Munisípiu Bobonaru, Miguel Freitas, hateten iha tempu badak sei kria enkontru ho dirijente eskola, Ekipa Jestaun Programa Merenda Eskolar no fornesedór sira atu labele sosa tan ikan tongkol.
“Ohin ne’e sira-nia menu ikan duni, tanba sira sosa mak sala afeta ba labarik sira. Entaun ida-ne’e sai hanesan referénsia ida ba ami atu habelar informasaun ba Diretór eskola sira, ekipa Jestaun Programa no Tezoreira sira atu nune’e akontesimentu sira hanesan ne’e labele akontese tan iha loron tuir mai,” nia hato’o.
Tuir dadus tinan letivu 2025 totál estudante iha EBF Budin hamutuk 244.
Jornalista : Sergio da Cruz
Editora : Julia Chatarina
