DILI, 16 Juñu 2025 (TATOLI) – Prezidente Repúblika, José Ramos Horta, informa ba Parlamentu Nasionál (PN) katak sei hala’o viajen privada bá Malázia entre loron 17 no 19 Juñu.
Tuir pedidu Prezidente Repúblika nian iha testu ne’ebé lee husi Vise-Sekretária Meza, Maria Teresa Silva Gusmão, Xefe Estadu solisita ba Parlamentu Nasionál konsentimentu préviu vizita privada bá Malázia durante loron tolu ho intesaun tanba simu konvite husi Universidade Taylor’s Malázia, ne’ebé sei atribui títulu Doutór Honoris Causa.
Hafoin kompromisu referidu kumpre, Prezidente Repúblika sei kontinua kedas halo viajen bá Mónaku, iha ne’ebé vizita ofisiál ida-ne’e marka ona ba loron 23 to’o 25 Juñu 2025, tuir pedidu ba konsentimentu anteriór ne’ebé hatama ona ba PN iha loron 02 Juñu.
Nune’e ,Xefe Estadu sei auzente iha territóriu entre loron 17 to’o 26 Juñu tinan ne’e.
Lembra katak, iha loron 10 Juñu 2025 Parlamentu Nasionál liuhusi plenária aprova pedidu dezlokasaun ofisiál Prezidente Repúblika bá Mónaku, tanba hetan konvite husi Majestadu Liurai-Mane Albert II Mónaku. Autorizasaun ne’e konsede ho votu a favór 40, kontra 9, no abstensaun 0.
Notísia relevante: Parlamentu autoriza vizita Prezidente Repúblika bá Mónaku
Jornalista: Arminda Fonseca
Editora: Maria Auxiliadora
