BOBONARU, 17 Juñu 2025 (TATOLI)–Ekipa teknika Veterinária husi Diresaun Servisu Agrikultura munisípiu Bobonaru, iha Domingu (15/05) ne’e, halo teste rápidu ba asu ida-ne’ebé semana kotuk tata ema na’in-hitu iha aldeia Vila-Maria, suku Rairobo, postu administrativu Atabae, ho rezultadu pozitivu infetadu vírus raiva.
“Ida daudaun virál ne’e iha Atabae, ne’e rezultadu fó sai ona katak asu ne’e pozitivu raiva duni,” Tékniku Veterinaria munisípiu Bobonaru, Joanino Guterres, informa ba Jornalista sira, Segunda (16/06) ne’e, iha edifísiu Servisu Agrikultura Autoridade munisípiu Bobonaru.
Xefe Sentru Saúde Komunitária (SSK) postu administrativu Atabae, Roberto Dao Bitin, konfirma pasiente sira ne’ebé asu tata hetan ona vasinasaun.
SSK Atabae iha fulan ne’e rejista pasiente hamutuk 11 mak asu tata no daudaun ne’e simu ona vasinasaun.
“Sira na’in-hitu ne’e daudaun hela iha uma ho kondisaun di’ak, agora mós ami vasina tan ida loron primeiru, loron tolu, loron hotu, depois loron-14 no fulan-ida nia agora vasina la’o hela, pasiente sira asu tata ne’e ami asegura hotu,” nia akresenta.
Notísia Relevante : Konfirmadu husi HNGV: Pasiente ne’ebé transfere husi Maliana mate tanba pozitivu raiva
Koordenadór Autoridade munisípiu Bobonaru, Celestino Marques, dehan, daudaun ne’e ekipa konjunta tun ona ba terrenu halo deseminasaun informasaun no vasinasaun iha fatin risku sira hodi prevene transmisaun vírus raiva.
Autoridade munisípiu Bobonaru sei koordena no husu apoia husi nasionál atu halo intervensaun rápida, bainhira vírus ne’e alastra maka’as liután.
“Ida-ne’e depende ba Servisu Munisipál relevante mais tékniku sira mak hatene liu, se presiza halo operasaun ha’u hein de’it hato’o relatóriu mai, asaun sai mak presiza halo prevensaun ba animál sira ne’e hato’o mai para ita halo intervensaun, nune’e ita prevene vítima ba moras ne’e labele barak liután,” nia katak.
Koordenadór Autoridade munisípiu Bobonaru apela ba komunidade hotu atu koopera ho ekipa sira liuhusi entrega asu hodi simu vasina atu prevene no hakotu korrente vírus raiva.
“Bainhira asu tata ema ruma tenke halai lalais bá fasilidade saúde hodi simu vasina. Liafuan saúde dehan ita-nia saúde iha ita-nia liman rasik, entaun liafuan no filosofia ida-ne’e ita hotu kaer tenke ser kuidadu ita-nia saúde di’ak para moris saudável,” nia katak.
Notísia Relevante : Joven ida iha Maliana hakotu iis tanba infetadu virus raiva
Departamentu Veterinaria relata dadus husi Janeiru to’o Marsu 2025, asu hamutuk 20 pozitivu vírus raiva, ne’ebé númeru ne’e husi postu administrativu neen iha munisípiu Bobonaru, maibé rejista barak liu iha Maliana no Kailaku ne’ebé konsidera hanesan área risku tanba besik fronteira.
Bazeia ba dadus husi Vijilánsia Epidiomolojia Servisu Saúde munisípiu Bobonaru, hahú husi Janeiru to’o ohin (16/06) rejista asu tata ema na’in-90, ne’ebé husi númeru ne’e joven na’in-ida ho idade 19 lakon vida no labarik feto ida ho idade tinan 7 baixa hela iha Hospital Nacional Guido Valadares (HNGV) Bidau-Dili.
Jornalista : Sergio da Cruz
Editora : Julia Chatarina
