DILI, 17 Juñu 2025 (TATOLI) – Investidór internasionál na’in-12 husi Austrália Osidentál vizita Timor-Leste hodi avalia poténsia manganés ho klase mundiál ne’ebé deskobre iha munisípiu Lautein no Baukau.
Vizita investidór sira ne’e durante loron rua, hahú 17 to’o 18 Juñu, hanesan parte ida husi kontinuasaun ba esplorasaun Estrella Murak Rai (EMR), no joint venture entre Estrella Resources no empreza estatál mineira Murak Rai Timor (MRT).
Diretór-Jerál Estrella Resources, Christopher J. Daws, hateten vizita ne’e hanesan akompañamentu ida ba atividade esplorasaun intensivu liu fulan 14 dezde empreza Estrella Resources hetan konsesaun iha konkursu nasionál mineiru Timor-Leste nian iha Novembru 2023.
“Ami deskobre ona mineralizasaun manganés ho grau aas ne’ebé promisór tebes, no agora ami iha prosesu atu define rekursu sira-ne’e nia estensaun, liuliu iha Lospalos, Lautém, nune’e konvida sira mai haree”, Daws hateten hafoin hasoru malu ho Primeiru-Ministru, Xanana Gusmão, iha Palásiu Governu, ohin.
Tuir Daws, investidór sira ne’ebé mai ne’e reprezenta asionista boot sira Estrella Resources nian no mai husi empreza prinsipál sira hanesan CPS Capital Group, Barclay Wells Limited, no Ratta Investments Pty Ltd.
“Ami hakarak hatudu ba sira serbisu esplorasaun ne’ebé ami realiza ona, nune’e mós potensiál futuru ne’ebé boot tebes iha Timor-Leste. Ida-ne’e hanesan tempu ida ne’ebé emosionante tebes ba esplorasaun minerál iha nasaun ida-ne’e”, nia akresenta.
Iha enkontru ho primeiru-ministru, nia afirma Estrella nia kompromisu ba dezenvolvimentu indústria mineira Timor-Leste nian. “Ha’u hateten katak ita hetan duni buat ida ne’ebé folin liu, manganés ho klase mundiál. Ida-ne’e hanesan oportunidade boot ida ba povu Timór”, Daws hateten.
Ministru Petróleu no Rekursu Minerál, Francisco Monteiro, fó benvindu ba vizita investidór sira-nian no afirma katak Governu fó apoiu tomak ba parseria esplorasaun ne’e.
“Prezensa investór internasionál sira iha fatin projetu sira hanesan Lautein, Mahina 1 iha Ira-Miri no Weru Mata iha Laga hatudu konfiansa mundiál iha potensiál rekursu naturál Timor-Leste nian”, nia dehan.
Estrella Resources, liuhusi nia entidade lokál Estrella Resources R.P., hetan ona lisensa esplorasaun inisiál tolu ne’ebé kobre 121,5 km² iha munisípiu Lautém no lisensa adisionál haat ne’ebé kobre 194,4 km² iha Baukau. To’o ohin loron, EMR nia área esplorasaun totál ne’ebé kaer atinje ona 648.41 km².
Nune’e, liuhusi ninia parseria ho Coresearch, EMR lori pakote perfurasaun minerál esplorasaun dahuluk mai Timor-Leste. Rezultadu signifikativu dahuluk hetan iha loron 30 Maiu 2025, bainhira perfurasaun esplorasaun modernu dahuluk ho susesu tama iha kamada manganés boot ida iha superfísie nia okos iha Ira-Miri Prospect.
Empreza ne’e mós emprega no fó ona formasaun ba joven profisionál timoroan na’in-10 iha área oioin esplorasaun modernu nian hanesan jeofízika, ambiente, no perfurasaun.
Nia dehan ida-ne’e hatudu EMR nia kompromisu atu harii kapasidade lokál no apoia dezenvolvimentu indústria mineira ne’ebé sustentavel iha Timor-Leste.
Notísia relevante: Murak Rai-Estrella Resources kontinua halo estudu ba manganés iha Lautein
Jornalista: Arminda Fonseca
Editora: Maria Auxiliadora
