PAM Aileu aprezenta keixa ba Ministériu Públiku kontesta atuasaun CAC
DILI, 17 Juñu 2025 (TATOLI)—Prezidente Autoridade Munisípiu (PAM) Aileu, João Bosco dos Santos, tersa ne’e, hato’o keixa ba Ministériu Públiku tanba konsidera katak atuasaun ne’ebé Komisaun Antí Korrupasaun (CAC-sigla portugeza) halo hodi identifika nia iha tersa (10/6), iha edifísiu CAC, la tuir regra ezekusaun.
“Ohin loron ha’u mai hato’o keixa ba Ministériu Publika relasiona ho asaun CAC ne’ebé mak hala’o buska ba ha’u iha eskritóriu. Momentu CAC ba halo apreensaun no buska ne’e laiha mandadu Tribunál,” João Bosco hateten ba jornalista sira hafoin hatama keixa iha Prokuradoria Jerál Repúblika, Kolmera.
Nia haktuir, CAC la notifika nia sobre sá no sá oras mak halo buska, maibé CAC uza nia podér halo buska.
“Keixa ne’ebé mak ha’u halo no hato’o ba Ministériu Públiku atu defende interese Estadu tomak atu hetan onra no justisa. Atu ne’ebé akontese, ha’u konsidera ekipa CAC halo prosesu abuzu podér,” nia afirma.
Notísia relevante: Ezekuta orsamentu Estadu la tuir regra, CAC buska PAM Aileu
Nia solisita Ministériu Públiku presiza investiga ho kle’an ba grupu ne’ebé hala’o pratika abuzu podér iha CAC hodi viola Artigu 33 ne’ebé konsagra iha Konstituisaun RDTL kona-ba direitu ba privasidade.
“Husu mós ba Ministériu Públiku atu investiga mídia hirak-ne’ebé mak publika atu irregularidade no abuzu podér ba públiku hodi hatún ema-nia dignidade,” nia fó-hanoin.
Jornalista: Natalino Costa
Editór: Xisto Freitas da Piedade
