DILI, 17 Juñu 2025 (TATOLI)-Prezidente Parlamentu Nasionál (PPN), Maria Fernanda Lay, hala’o enkontru ho Primeiru-Ministru (PM), Xanana Gusmão, hodi diskute lei sira ba adezaun plena Timor-Leste ba Asosiasaun Nasaun Sudeste Aziátiku (ASEAN, sigla inglés).
“Mai ko’alia ho Prezidente Parlamentu hodi informa reuniaun horisehik kona-ba ASEAN, lori ona dokumentu sira mai atu husu ba Prezidente dehan ba bankada sira preparasaun ba ASEAN. Buat importante ida mak lei hodi aprova ita atu tama ba ASEAN”, Xanana Gusmão dehan ba jornalista sira hafoin sorumutu iha PN.
Xefe Governu dehan la kle’ur tan Parlamentu sei tama resesu, nune’e hala’o enkontru koordenasaun hodi bele trata lejizlasaun sira ho país nia adezaun plena.
“Ne’e mak ami haree ba ajenda iha ne’e, antes resesu no depois resesu, haree mós saida mak ami atu haruka lei sira ne’e, lei balun haruka tiha ona, maibé ida-ne’e urjente”, nia akresenta.
Xefe Governu la esplika detallu kona-ba lejizlasaun hira mak haruka ba órgaun lejizlativu no hira mak sei haruka tan no lejizlasaun saida de’it atu iha diskusaun no aprovasaun molok Timor-Leste adere ba ASEAN iha Outubru tinan ne’e.
Antes ne’e, Prezidente Parlamentu Nasionál, Maria Fernanda Lay, hateten Parlamentu sei prioriza hodi diskute lejizlasaun no tratadu sira ba adezaun plena Timor-Leste ba ASEAN.
Parlamentu rasik kria ona komisaun eventuál akompañamentu ba prosesu adezaun Timor-Leste ba ASEAN. Komisaun ne’e hala’o knaar atu trata no diskute lejizlasaun no tratadu sira liga ho Timor-Leste nia adezaun ba organizasaun ne’e.
Iha simeira ASEAN ba da-46, ne’ebé hala’o iha Kuaa Lumpur, Primeiru -Ministru Malázia nian, Dato Seri Anwar Ibrahim, deklara ofisialmente katak Timor-Leste sei sai membru plenu iha Simeira ASEAN ba da-47 ne’ebé sei realiza iha Outubru tinan ne’e, iha Kuala Lumpur.
Timor-Leste nia mehi atu adere ba ASEAN hahú kedan iha fulan-Juñu 1974 no ohin loron realiza duni mehi ne’ebé antes ne’e jerasaun tuan sira iha.
Notísia relevante: Parlamentu prioriza diskusaun lei sira ba adezaun plena Timor-Leste ba ASEAN
Jornalista: Nelson de Sousa
Editora: Maria Auxiliadora
